Jowai, Nailur 18: Ka kynhun ïalehkai jong ka Cham Cham SCSC kala long syndon ka lahduh haka kyrdan 3rd Division 2026 League Stage, bala pynïaid daka East Jaiñtia Hills District Football Association (EJHDFA) kaba la long mynta ka sngi 18 tarik u Nailar, 2025 ha madan Diengshynrum, Khliehriat East Jaiñtia Hills District.
Haba phai sha ka jingïakhun phainal hapdeng ka Rymbai Pohskur SC bad ka Cham Cham SCSC kala long kaba itynnad bha namar baroh ar khynhun kim shem la ïoh ban pynkhih jar tad haduh ba kut jong ka por bala buh kila ïakhaid khlem don kiba ïoh ban thep kol (0-0).
Naka liang ki bor pynïaid kila pynïakhun noh da ka jingïashut Tie-Breaker ha kaba ka kynhun Cham Cham SCSC kala jop da 2-0 kol bad long syndon kum ka lahduh mynta u snem.
Ïa kane ka lympung la wan ban pynhap pyrda da u kongsan ma Blassuse Rymbai na ka Dorbar Shnong Rymbai, ha ka jingdonlang u Karlud Dkhar (Ex-Rangbah Shnong Cham Cham) kum u Symbud Kongsan ha ryngkat ki nongkitkam ka Association bad ki Nongkitkam jong ka Tournament Committee nalor ka jingwan sakhi lang ki riewieit phutbol ka thaiñ.
La sam ruh ïa ki khunsnam Best Player sha u Jomi Phawa na ka Cham Cham SCSC, Best Goalkeeper la ïoh da u Dashrain Dkhar na ka Cham Cham SCSC, Top Scorer of the Tournament la ïoh da u Eveningland Pohshna na ka Umstain SSCC uba la ïoh thep haduh 5 kol.
Na ka bynta ka kynhun kaba ïoh rah ïa ka nam lahduh ka Cham Cham SCSC kala ïoh khur 30 hajar tyngka lem bad ka trophy, katba ka kynhun ba wan ba ar ka Rymbai Pohskur SC kala ïoh 15 hajar lem bad ka trophy.
La pyntip ka jingïakhun phainal jong ka 2nd Division 2026 jong ka EJHDFA kan long lashai ka sngi 19 tarik u Nailur ha ka por 2 baje nohphai sngi hapdeng ka SWO Moosianglamare Old SC pyrshah ïaka Dkhiah West SCSO.
