Shillong, Nailur 18: Ki nongïalehkai ka Meghalaya ki la aiti lut ïa ka bor ka sor hynrei ym don uwei ruh uba lah ban jam shakhmat palat ïa ka semifinal ha ka sngi ba lai jong ka North East Zone Inter-State Badminton Championship 2026 ha JN Indoor Stadium.
ïa kane ka lympung kaba saw sngi lynter na ka bynta ki jylla ka thaiñ shatei lammihngi, la pynlong da ka Meghalaya State Badminton Association ha ka ryngkat ka jingkyrshan jong ka Directorate of Sports and Youth Affairs bad hapoh ka jingpeit jong ka Badminton Association of India.
Hynrei da kaba poi sha ka semifinal, ka mut ba uwei pa uwei na ki nongïalehkai jong ka Meghalaya, kin leit phai ïing ryngkat bad ka takma rnong, ka khusnam kaba biang na ka bynta ka jingtrei shitom ban pyntbit ïalade na ka bynta kane ka lympung da kaba phaikhmat ruh sha ka 39th National Games jong u snem ban wan, ba ka Meghalaya kan sa pynlong.
Ka Elsarica Umdor ka dei kaba nyngkong eh napdeng kine ban ïakhun ïa ka semifinal, bad ka la liem noh hakhmat ka Avikaa Borgohain jong ka Assam kaba la jop da 15-7, 15-10, ha ka jingïakhun ba marwei jong ki kynthei (women’s single).
Hadien kane, ka jingïakhun U-19 girls’ single, ka Netania T Tariang ka la mad ïa ka jingïakhun kaba tyngeh pyrshah ïa ka Noimikha Saikia jong ka Assam, kaba la jop suk da 15-3, 15-8.
Ka Netania ka la don bynta ruh ha ka U-19 Mixed Doubles semifinal ryngkat u paralok jong ka, u Gavin Kharbuki. Ki la shah rem noh hakhmat ka Vanlalpekhlua bad Lalrinhlui Hmar jong ka Mizoram da 15-10, 15-10.
Kiba khatduh jong ka jylla ban ïakhun ha ka semi final ki long u Gitchiak Bregim A Sangma bad u Sonnal Joshi kiba la shah rem noh ha u M Hemam bad u P Konjengbam jong ka Manipur da 15-10, 15-6.
Kane ka lympung ka la sakhi ïa ki nongïalehkai ba kynsai tam jong ka thaiñ Shatei Lam Mihngi, kynthup ïa kito kiba la seisoh bha ha ka senior level bad kumjuh ruh kito kiba dang kiew lyngba ki kyrdan U-19.
Ka kong Idashisha Nongrang-Director General of Police jong ka Meghalaya, kan wan kum ka kongsan ha ka sngi pynkut mynta ka sngi.
