SHILLONG, Nailur 18: Ka Ryntih SC ka la sdang ïa ka jingïalehkai ba nyngkong jong ka na ka Group B ha ka lympung First Division 2026 ba la pynïaid da ka Shillong Sports Association, da ka jingjop kaba da 3-2 kol pyrshah ïa ka Nongrim Hills SC hynne ka sngi Thohdieng, ha SSA Ground, Polo.
Baroh lai tylli ki kol jong ka Ryntih ki la wan ha ka kylla step, ha kaba u Dawandap Pura Biam Pathaw u la pynkhihjar ar sien ha ka minit kaba 14 bad 25, bud sa ka kol jong u Torilang Wanniang ha ka minit kaba 40.
Na ka liang jong ka Nongrim Hills ka la pynphai shi kol lyngba u Arki Wao Kharmalki (44’) shuwa ban jam sha ka por shongthait. U Bapynkmen Kharsati (81’) u la thep ïa ka kol kaba ar ha ka kylla miet, hynrei kam shym la biang ban pyllait im ïa ka kynhun na ka namrem, ha kaba ka Ryntih ka la khur pura ïa ki lai point ban lamkhmat ïa ka Group.
Ka jingïalehkai SSA 1st Division 2026 ha kane ka sngi Saitjaiñ (19.09.2026) kan long jong ka Group B hapdeng ka Mylliem Lum pyrshah ïa ka Pohkseh SC. Kane ka jingïalehkai kan long ha ka por 12:15 baje mynsngi ha SSA Ground.
