Dawa u MP ka Congress ban buh jaka thoh eksam sorkar pdeng ha Shillong bad Tura

Shillong, Jylliew 23: U Member of Parliament (MP) na Tura uba dei ruh na ka seng Indian National Congress u Saleng A. Sangma u la ïakynduh ïa ki heh ophisar kiba na ka Union Public Service Commission (UPSC), ka SSC, ka RRB, bad na ka DoPT ha kaba u la dawa ba dei ban pynsted ïa ka jingthungkam ha ki jaka treikam ka sorkar pdeng bad kumjuh ruh ban don ki jingtei kiba bha na ka bynta ki jaka thoh eksam na ka bynta ki samla jong kane ka thaiñ shatei lammihngi.
Ha ka jingïalang ki heh ophisar ne ka high-level meeting, u MP ka Tura u Saleng Sangma u la kyntu ïa ki bor ba dei peit ba ki dei ban pynsted noh mardor ïa ki rukom treikam ban pyndap ïa ki hajar tylli ki kam kiba lait ha kiba bun ki ophis treikam jong ka sorkar pdeng khnang ba kan long kum ka lad ban thaw bad pynmih shuh shuh ki lad aikam aijam ïa ki samla jong kane ka thaiñ.
Shuh shuh halor kane, na ka liang u MP u la kyrshan jur na ka bynta ban thaw ïa ki examination center na ka bynta ki kam kiba lait hapoh ki jaka treikam sorkar pdeng bad ïa kine ki jaka dei ban don lang ruh hapoh Tura bad Shillong.
U la kdew ba ki samla kane ka thaiñ kumba long mynta ki mad ki jingeh ba khraw na ka jinghap ban pynlut ïa ka pisa bad ka jingeh ha ka bor pyrkhat pyrdaiñ na ka daw ba ki hap ban ïaid ïa ka lynti kaba jngai shabar jong ka jylla bad na kane ka thaiñ tang na ka bynta ban shong bad ban ïakhun ïa ki eksam ïakob jong ka ri.
“Ka jingkyntiew bad pynbun ïa ki jaka thoh eksam sha kine ki thaiñ khamtam eh ha Shillong bad Tura kan ïarap naba ki long ki pdeng ban pynthikna ïa ka jingsuk bad ki lad ba ïaryngkat lang na ka bynta ki kyrtong na kane ka thaiñ shatei lammihngi,” ong Saleng Sangma MP ka Tura.