Hadien shi taïew tam ba ki shong ïing, kmen ki khynnah skul ka KJP ba la ïoh leit skul biang

Shillong, Jylliew 02 : Ka Khasi Jaiñtia Presbyterian Girls Higher Secondary School ha ka 1 tarik Jylliew ka la sdang biang ban shim class ïa ki khynnah skul kiba la shong ïing noh ha ki shi taïew tam na ka jingshah bam duh ka ïing skul ha ki thylliej ding kaba la jia ha ka 21 tarik u Jymmang 2023.
U nonglum khubor jong u Mawphor haba buddien ïa ka jingjia shah bam duh jong kane ka ïing skul, ha ka sngi Thohdieng ka 2 tarik Jylliew la lap ba ki khynnah skul ki la ïoh biang ban ïakynduh ïa ki nonghikai, ban ïoh ïalehkai lang bad ki paralok da ka durkhmat ba phuh sam rkhie bad khamtam ki la ïoh biang ki jinghikai ïa ki lynnong kot kaba dei ka bynta ba hakhmat tam na ka bynta ki khynnah skul.
Haba ïoh ban ïakren bad ki khynnah skul, ki la pynpaw ka jingsngewsih ba ka skul ba ki pule ka la ing noh ha ki thylliej ding kiba shyrkhei. Hynrei ki la pynpaw pat ka jingsngewkmen ba mynta ki la ïoh biang ban wan sha skul ban ïoh ki jinghikai. “Ngi da sngew bynnud ïa kane ka skul kaba la ai jingnang jingstad bad kaba la pynmih ïa shibun ki khraw pyrkhat. Ngi la duh jingkyrmen haba ka ïing skul ka la ing noh, hynrei ngi dap pat da ka jingsngewkmen ba mar syn pynbna i principal ba ka skul kan sdang noh ha ka 1 tarik, mynta ngi la ïoh ban bteng biang ïa ki jingpule,” ong iwei ki khynnah skul.
Ki la ïathuh ruh ba ha kine ki shi taïew tam ki lynga pisa haba ki shu shong tang haïing hasem bad kwah noh beit ban wan sha skul. Ki la kyntu bad kyrpad rit na ki paidbah, ki kynhun seng bhalang bad na ka Sorkar ba ba kin ïarap noh synñiang lem khnang ba yn lah ban pynïeng biang ïa ka skul kaba thymmai.
Haba ïakren bad u Babu Kular Khongjirem u la ïathuh ba ki la lah ban pynlong klass da kaba pynbeit ha ki kamra kiba dang lait na ka jingshah bam duh ha ka ding bad ka jingwan jong ki khynnah skul ka long kaba ïaid beit ïaid ryntih kumba ju long. “Khnang ba ki khynnah skul kin ym duh ïa ki jingpule, ngi la pynbeit ban pynbit pynbiang ha kiwei pat ki kamra klas bad ngi sngewkmen ba ngi la lah ban pynbit pynbiang nadong sha dong bad ka jingwan jong ki khynnah skul ruh ka long kaba ryntih lait noh tang ar ne lai ngut kibym lah ban wan sha klas na ki daw shimet jong ki,” ong u Babu Khongjirem.
Kum ban pynkynmaw hangne, ka KJP Girls Higher Secondary School kaba la ïeng la 131 snem ka la shah bam duh noh ha ki thylliej ding kiba shyrkhei ha ka step jong ka sngi U Blei ka 21 tarik u Jymmang 2023, hynrei ha katei ka jingjia ym shym la don kano kano ka jingjia ba sngewsih, lait noh tang ka jinging khong ki kot ki sla, ka ophis bad kiwei kiwei.