Shillong, Jylliew 2 : U Myntri ka tnad pynmih bording ka jylla u Abu Taher Mondal mynta ka Sngi Thohdieng u la ong ba ka sorkar ka dang pynkhreh ban aiti ha ka Indian Institute of Technology Guwahati (IITG) ban bishar bniah ïa ka jigkieng Umiam.
Haba ïakren bad ki nongthoh khubor u la ong “ Hooid wat la ngim pat aiti haduh mynta ban wan bishar bniah ïa kane ka jingkieng namar ngin dang ïashong pyrkhat sani shwa hynrei ngi dang pynkhreh hi ban aiti ha katei ka IITG khnang ba kin wan ban bishar bniah ïa ka jinglong jingman ka jingkieng”.
U la ïathuh dei tad hadien ba la ïoh pdiang ïa ka kaiphod na ka IITG yn sa pynkhlaiñ ïa ka jingkieng Umiam khnang ba kan nang skhem wat hadien ba ka rta jongka ka la kut ruh.
Ha ka 16 tarik Jymmang u Mondal lem bad ki heh khlieh ka IITG ki la leit jurip ïa katei ka jingkieng Umiam hadien ba la ïoh bun ki jingujor halor ka jinglong jongsyier jongka jingkieng. Ha katei ka jingjurip ki la lap hi ba ka rukom long jongka jingkieng kam long shuh kaba paka khamtam ki nar ( bearing) kiba pynskhem ïa ka jngkieng.
“ Kumta halor kane ngi la phah shna ïa kitei ki bearing ha ka company bad tang shu dep shna ki briew jong ngi kin sa leit ban thew ïa ka jingkhia ha katei hi ka kompani” ong u Mondal. Hynrei ha kajuh ka por yn phah bishar bniah ruh ïa ka jingkieng khnang ba lada lap ïa ka jingdonkam ban maramot ne ban pynskhem yn dang ïoh ban pynskhem ïa ka, ong biang u Myntri.
U la ïathuh ruh ba mynta la pyrkhing bha ïa ka jingïaid ki trok heh na katei ka jingkieng Umiam. La buh ruh ïa ki briew ba kin peitngor ïoh don kiba pynkheiñ ïa kane ka hukum khamtam lei lei ha ka por miet.
Ha u snem ba la dep ka Safety Audit ba la leh ha ka jingkieng Umiam ka long ba ka jingkhynñiuh jongka jngkieng ha ka por ba ïaid ki kali ka dang biang hi.
Lah ruh ban pynkynmaw ba ha u Lber mynta u snem u Mondal u la ïathuh hapoh ka ïing Dorbar Thawaiñ Assembly ka jylla ba ka rta jongka jingkieng Umiam ka la kut bad ka sorkar ka dang pynkhreh ban pynskhem shuh shuh ïa ka jingkieng khnang ba kan dang ïai skhem bad lah ban pyndonkam ïaka.
