Wat la pyrshah ïa ka Odd/Even, shi taïew shuwa yn ïatreilang ka Synjuk ki Taksi ha Shillong

Shillong, Jylliew 02 : Ka kynhun jong ki kali kamai ba kynthup naduh ka East Khasi Hills Local Taxi Welfare Association (EKHLTWA) bad kumjuh ka Synjuk Ki Nongniah Taxi Sor bad Khapsor (SNTSK) ha ka sngi Thohdieng ki la ieng pyrshah ia ka hukum jong ki bor pyniaid Distrik ban pyniaid noh Odd/Even ia ki kali kamai ha nongbah Shillong da ka thong ban weng ia ka dheng kali ha ka nongbah.
Kitei ki ar tylli ki kynhun jong ki kali kamai, ki la kynduh ruh ia ka Deputy Commissioner ka Distrik, Kong RM Kurbah hynne ka sngi ryngkat ka jingkyrpad ban weng noh ia katei ka jingbthah.
Kane ka jingkhihwin ki nongniah kali kamai ha ka nongbah kadei hadien ba ka la mih ka hukum kaba bthah ia baroh ki kali kamai la ka long naduh ki bos saw SPTS, ki maxi cab bad ruh ki kali thoh iong thohstem kiba iaid na Kashari Point sha ki bynta jong ka Khyndailad. (Police Bazar) bad sha Motphran ba kin sdang noh ban iaid Odd-Even noh naduh ka 05tarik u Jylliew.
Hynrei ha ka jingïakynduh bad ka DC ka la kyrpad ïa ki ba kin iai shah shuwa mynta shi taiew ka ban long kum ka jingpyrshang ïa kane ka rukom pynbeit thymmai. Na ka liang ka Synjuk hadien ba ka la ïatai ïa kane ka jingpynbeit ka DC, ki la rai ban ïatreilang na ka bynta shi taiew kumba kala kyrpad bad hadien ba kut ka shi taiew kin sa ïashong pyrkhat.
Haba kren bad ki lad pathai khubor, u President ka EKHLTWA, Bah Wandonbok Jyrwa u la ong ha ka jingkynduh ia ka DC kaba dei ruh ka Chairman jong ka Regional Transport Authority ki la pynpaw ba kim lah satia ban pdiang ia katei ka hukum.
“Ngim lah satia ban pdiang ia katei ka hukum namar ka Khyndailad bad Motphran ki dei ki jaka kamai kiba pdeng kiba heh bha ha ka thain bad kumta lada khang ia ki kali kamai ban iaid na kitei ki ar tylli ki jaka kadei ka bym lah satia ban pdiang,” u la ong.
Shuh shuh u la iathuh ba ka DC ka la pyntip ba kim lah shuh ban weng ia katei ka hukum namar kadei kaba bthah da ka Meghalaya High Court. Kumta, u la ong ba kim sngewmyntoi shuh ban bteng ia ka jingiakren.
U Bah Wandonbok u la iathuh ruh ba ka Association ka la rai ban ujor noh sha ka Meghalaya High Court pyrshah ia katei ka hukum kaba la ktah ia ka kamai kajih jong ki kali kamai.
“Ka sorkar kadei ruh ban kynmaw ba ki taksi kamai ki la siew ia ka khajna kaba heh bha bad kumta da kaba khang ban iaid na kitei ki jaka ka pyni ba kim khein briew ia ki.”
Ha kajuh ka por, u la ong ba ka sorkar kadei ruh ban wad ia ka daw tynrai jong ka dheng kali ha ka nongbah Shillong ym ban shu ong ba ki taksi ki dei ki daw ka dheng kali khamtam haba ki don bun bha ki kali shimet ruh kiba iaid ha ka nongbah.
“Kumta, ngin sa kyrpad ia ka Kashari ban pyntikna ba kan ym don kano kano ka jingle shilliang khmat ia ki kali kamai,” u la ong.