Shillong, Jylliew 02: Ka kynhun ki Nongñiah Taksi kamai-ka East Khasi Hills Local Taxi Welfare Association (EKHLTWA) mynta ka sngi Thohdieng, ka la byrngem ban mudui da ka mukotduma sha ïing bishar Meghalaya High Court pyrshah ïa ka hukum jong ka Deputy Commissioner (DC) ka East Khasi Hills halor ki odd bad even number.
Kane ka jingbyrngem kala mih halor ka hukum ka Deputy Commissioner ban pyntreikam noh da ka Odd/Even number ïaki kali kamai ki ban kamai kiba ïaid na IGP sha Khyndai Lad bad shaduh Motphran naduh ka 5 tarik Jylliew. Kane kan treikam tang ïa ki kali kamai kiba ïaid kamai sha Khyndai Lad bad sha Motphran haba buh kyndon ruh ba baroh ki kali ki dei ban dei kiba pyndait ïa ki HSRP.
Shuwa kane, ki Nongniah Taxi kila pynlong ïa ka jingïalang paidbah ha Madan Malki bad kila pynrem jur ïa ka hukum ba la pynmih da kane ka khliehduh ka District, haba pynpaw ba kane ka dei ka jingpyrshang ban knieh ïa ka jakpoh jong kiba kamai kali.
Hadien kane, ki Nongniah taxi kila ïatur paidbah sha ka Ophis ka Deputy Commissioner ban dawa ba kane ka khliehduh ka District, ka dei ban pynduh pyndam noh ïa kane ka hukum.
Haba kren sha ki lad pathai khubor hadien ka jingïalang bad ka Deputy Commissioner, u President ka EKHLTWA bah Wandonbok Jyrwa ula ong ba haka jingïalang bad ka DC, baroh ki nongniah taxi kila pynpaw ba ki pyrshah jur ïa ka hukum ba ka pynmih ban pyntreikam daka Odd/Even ïaki kali kamai ha Shillong haba pynpaw ruh ba kum ki Nongniah taxi da lei lei ruh ym pdiang satia ïa kane ka hukum.
U bah Wandonbok ula ong ba kum ki nongniah kali kiba kamai daka ba ñiah Taksi, kin nym burom satia iï kane ka hukum jong ka Deputy Commissioner haba bynrap ba ki Nongniah Taxi kin ïai kamai kumba ju kamai ha kine ki sngi ban wan bad lada mih kano kano ka kynrum kynram, ka DC kan hap ban bah khlieh.
“Haka jingïalang ka DC kala pyntip ba kam lah shuh ban weng ïa ka hukum namar kane ka hukum kadei ruh kum shi bynta ban pyntreikam ïaka jingbthah ka ïing bishar Meghalaya High Court” ula pyntip.
Ula ïathuh ba ka EKHLTWA kala kren shai hakhmat ka DC ba naka liang ki Nongniah kali kamai ruh kin sa file daka Affidavit sha ïing bishar pyrshah ïa kane ka hukum.
