Tura, Naiwieng 8 : Hadien ba da ki phew snem lynti ba kawei na ki Civil Sub Division kaba la rim tam ha ri lum Garo ka la treikam khlem da don wat tang kawei ruh ka Ambulance ha CHC mynta ka sngi u myntri ka koit ka khiah u James K Sangma ula pyllait ïa ka Ambulance kaba la shna kyrpang bad pyndait lang bad ka Advanced Life Support (ALS) na ka bynta ka CHC Dadenggre.
Kane ka ambulance kan long ka jingkyrkhu kaba khraw ïa ki paidbah kane ka sub division. Ka Dadenggre ka dei ka Constituency jong u myntri ka koit ka khiah hi.
Kane ka CHC ka la treikam da ki bun bun snem mynta khlem ka ambulance kumta ki briew kiba wan phah sumar kin hap ban wan beit da ki kali ba shu wai bad kali kamai nalor ba ka surok ka sniew bad ka surok ruh ka khim bha.
ïa kane ka ambulance la noh synniang sha ka sorkar da ka seng treimon sngewbha ka Hans Foundation.
“ Ka Ambulance ka long kaba kongsan bha na ka bynta ka koit ka khiah bad khlem ka ambulance ki doktor, ki nurse bad ki nongtrei baroh ki long kumba don ka jingduna dkhot met. Da ki snem lynter kane ka CHC kam don ambulance hynrei wat la katta ruh ki doktor bad ki nurse ki aibeit ka jingshakri hok ïa ki paidbah” ong u James K Sangma
Haba phah sha kine ki jingeh u myntri u la ai khublei ïaka Hans Foundation kaba la ïatrei lang bad ka sorkar ban ïarap ïa ki paidbah. U Myntri u la leit jngoh ruh ïaka CHC hadien ba la wai ka jingïalang pyllait paidbah ïa kane ka ambulance.
