Plie u CM ïa ka C&RD Block ba thymmai ha Siju, South Garo Hills

Shillong, Naiwieng, 08: U Myntri Rangbah ka Jylla u Conrad K. Sangma ha ka sngi Baar u la plie paidbah ïa ka C&RD Block ba tymmai ha Siju, South Garo Hills ban pynurlong ïa ka jingangnud kaba la slem jong ki paidbah.
U Myntri Rangbah haba kren kum u Kongsan ha kane ka sngi u la ong, ba kane ka ophis jong ka Block ha Siju kan long ka jingai burom ïa u Captain Williamson A. Sangma, uba long u Myntri Rangbah banyngkong eh ka Jylla, uba long u nongshong shnong jong ka Siju.
“U Captain Sangma u dei u briew uba don ka jingieid ba kyrpang ïa ki riewlum, uba la lamkhmat ban pynïoh ïa la ka jong ka jylla. Mynta ka sngi, ngi rakhe ïa ka Jubili Ksiar jong ka Jylla bad kan long ka jingsah kynpaw pateng pakit na ka jingplie ïa ka C&RD Block ha kane ka jaka,” ong u Myntri Rangbah.
Haba pynpaw ba ka jingdap 50 snem jong ka jylla ka dang sahdien bha haba ïanujor bad kiwei kiwei ki jylla u Sangma u la ong, “ngi la pynkhreh ïa ki Plan na ka bynta ki 50 snem ki ban sa wan bad ban pyntreikam katkum ba la thmu khnang ban pynthikna ba ka jingrakhe ïa ka jingdap 100 snem kan long ka jingrakhe ïa ka jingïaid shakhmat jong ka Jylla ha baroh ki liang.” Ha kane ka jingïalang, la sakhi ïa ki hajar ngut ki paidbah kiba la wan sakhi lang ha kaba la synran lang da u Deputy Speaker jong ka Meghalaya Legislative Assembly u Timothy D Shira, ki MLA kiba kynthup ïa u Rakkam Sangma, u Marcuise Marak, u Jim Sangma, u Rupert Momin bad u Chief Executive Member jong ka Garo Hills Autonomous District Council ha ka jingplie ïa u mawnongrim ban tei ïa ka ophis jong ka C&RD block ba thymmai.
Ki kynrem ki lyndan ki la leit jngoh ruh ïa ka ophis ba shipor jong ka Block kaba la shna ha Siju. Ka jingshna ïa ka C&RD block Building ba thymmai kan sa sdang shen.
U Myntri Rangbah shuh shuh u la ong ba jingplie ïa kane ka C&RD Block ba thymmai ka dei namarba ka Sorkar MDA ka angnud ban ïoh pyntreikam kham bha ïa ki skhim bad ki prokram bapher bapher ka sorkar.
U la ong ruh ba kane ka Block ba thymmai kan pynthikna ruh ba ki paidbah nongshong shnong kin nang kham kiew ha ka khih ka kamai da ka jingpyntreikam ïa ki prokram bapher bapher ka Sorkar.
Ha kane ka jingleit sha Siju u Sangma u la aiti ïa ki FOCUS plus Card sha ki nongïoh bha bad aiti ruh ïa ka Cheque sha ki Self Help Group kaba kot T.28 lak hapoh ka Meghalaya State Rural Livelihoods Society (MSRLS).
U la sam ruh ïa ki symbai khun sniang lyngba ka Rural Backyard Piggery and Poultry scheme-PROGRESS, ha kaba 1392 tylli ki khun sniang la sam sha ki 348 ngut ki nongri sniang bad 2500 tylli ki Syiar kuroiler la sam sha ki 50 ngut ki nongri syiar.
Ha kajuh ka por u Myntri Rangbah u la aiti ïa ka song pisa kaba T.1 lak ha ki kynhun seng samla lyngba ka YESS Meghalaya program.
Hadien kane u la plie paidbah sa ïa ka Collective Marketing Centre jong ka Gangga Awe IVCS ha Siju ba la bei pisa da ka Meghalaya Livelihood Access to Market Project bad plie ruh ïa ka Cold Storage Unit na ka bynta ban buh ïa ki mar rep ba kin ym pyut.
Katkum u kyrwoh, u Myntri Rangbah ka Jylla un sa leit plie paidbah sa ïa ka Rambrai C&RD Block ha ka shnong Rambrai, West Khasi Hills District ha ka sngi Balang ha kaba yn sa ïadonlang u Myntri ka tnat C&RD Block u Bah Hamletson Dohling, ki MLA ba kynthup ïa u Bah Kimfa S. Marbaniang bad u Bah Macmillan Byrsat.
Sa kawei pat ka C&RD Block ban leit plie da u Myntri Rangbah ka jylla u Conrad K Sangma kadei ka Lumshnong Community and Rural Development Block (C&RD) ha ka 26 tarik mynta u bnai Naiwieng 2022.
ïa kane la ïathuh da ki nongïalam ka Narpuh Border Area Joint Action Committee (NBA-JAC) hadien ba ki la dep ïa kynduh ïa u Myntri Rangbah ha ophis treikam jongu mynta ka sngi.
“ U Myntri Rangbah ula ïathuh ba un plie noh ïa kane ka Block ha ka 26 tarik. Ka sorkar ka la rai ban mang pisa na ka bynta ban thung briew bad shna ïa ka ophis jongka Block ym tang ban plie ïa u maw nongrim” Iathuh u Chairman ka JAC bad u MDC ka Narpuh u ma Emlangky Lamare.
Haba ai khublei ïa ka sorkar MDA kaba la pynurlong ïa kane ka kam kaba la sahteng bad thrang da ki paid ka Narpuh Elaka , u la ïathuh ba ïaka jaka ruh la dep tyrwa ban ai ei na ka bynta ban shna ïa ka ophis jongka Blolck.
“ Ngi la buh ruh ïa kawei ka ïing ba kane ka Block ophis kan treikam shipor” ong u ma Emlangky.
U la ïathuh kumba long mynta ka Narpuh ka sahdien bha ha baroh ki liang nalor ba kane ka thainñ ka dei kaba synniang bun eh ka khajna sha ka sorkar. Ki don haduh kumba 40 tylli ki shnong ki ban hap hapoh kane ka Lumshong C&RD Block.
U la ong kane ka Block ba thymmai kan long ka jingkyrkhu kaba khraw ïa ki paidbah namar mynshwa ki hap ban ïaid haduh 120 Km na Malidor shaduh Wapung C &RD Block wat la hap ban ai tang i shithi ba rit eh ruh.
Kham mynshwa ka NBAJAC ka pynpaw ka jingpyrshah jur ïaka jingpynkynriah ïaka Block na Lumshnong sha Wapung bad halor kane la ïakiew ïing lieh ïing saw ruh.
Halor kane u Chairman u la ong ba ka rai ba la shim da u Dr Mukul Sangma ka dei tang ka buit pynbiej election ïa ki paidbah.
“ Ka dei ka rai kaba la shu thoh ha ka kotsada. Ki paid ka Narpuh ki kwah ïa ka roi ka par na kata ka daw ki la shaniah ha ka sorkar u Dr Mukul Sangma hynrei haba ngi la bud dien ngi lap ba ka dei tangka buit pynbiej election ïaki paidbah” ong biang u MDC.
U la ong ba kane ka sorkar MDA ka la pynshisha ïa ki paidbah da kaba ai ïa kane ka Lumshnong C & RD Block khlem da leh politik ei ei ruh em hynrei ban ïarap ia ki paidbah ban jan sha ka synshar khadar ka sorkar.