Buddien ki nongïalam ka KSKBUH ïa ka ejahar ïa ki Pulit ba siat ïap ïa u Bah Cherish

Shillong, Naiwieng 08: Ki nongïalam ka Sur Ka Bri U Hynñiewtrep (KSKBUH) ha ka sngi Ba-ar ki la leit ban buddien da kaba ïa kynduh ïa u Dy SP ka Shillong City u Subir Sangma uba dei ruh u Investigation Officer(IO) ïa ka ejahar ba ki la mudui pyrshah ïa ki Pulit kiba donkti ban siat ïap ïa u nongïalam barim ka seng kieng atiar Hynñiewtrep National Liberation Council (HNLC) u Bah Cheristerfield Thangkhiew ha ka jingleit khynra ïa ka ïingsah jong u ha ka step synñïa jong ka 13 tarik, Nailar, 2021.
Haba kren sha ki lad pathai khubor hadien ba la dep ban ïakynduh bad u Subir Sangma, u Bah VG Lapang u la ïathuh ba ka jingïakynduh jong ki bad une u heh pulit ka long kaba ym don jingseisoh eiei namar ki la shu shah pynshad shrieh ban kynduh ïa uei u ophisar sha uwei pat bad na kawei ka thanat pulit sha kawei pat.
“Na ka liang u IO u la ïathuh ba um don bor eiei ban ïakren bad ngi bad u la ai jingbthah ba ngin leit ïakynduh bad u SP ka East Khasi Hill u Bah Sylvester Nongtnger ne u SP City u Bah Vivek Syiem namar dei tang ma ki ba don bor ban kren halor kane” u la ong.
Shuh shuh u la bynrap ba na ka liang jong ki ki dawa ba ym dei ban dang pynslem ban kem ïa ki pulit ba shim jingim u Bah Cheristerfield kumba ki kem ïa u Bah GK Ïangrai hadien ba mih ki jingkynnoh bamsap ïa u.
“Lada ngi pynïap wat ïa ki mrad mynta ngin shah kem hynrei ïa ki nongpynïap briew pat haduh mynta kim pat leh eiei namarkata, ngi dawa ba ka sorkar ka dei ban kem mardor ïa kito ki Pulit bad ban sei paidbah ruh ïa ka kyrteng kito kiba donkti ban dkhat ïa ka jingim jong u Bah Chersiterfield” u la bynrap.
U la ong ruh ba lada ki pulit kim leh eiei ïa kane na ka liang jong ki kin duh jingshaniah syndon ha ki Pulit bad kin ym ai shuh ruh ka jingïatreilang bad ki.