Hadien ba mih ka huri hura ha khappud Meghalaya-Assam ïa kynduh ki bor District ha Jowai

Jowai, Ïaïong 19: Hadien ka jingmih huri hura ha ki jaka khappud hadpeng ka jylla Meghalaya bad ka Assam ha Khanduli bad Moojem West Jaiñtia Hills District na ka liang ki bor District jong ka West Karbi Anglong (Assam) ki la wan hiar sha sor Jowai ban ïa kynduh ïa ki bor District ka West Jaiñtia haka jingialang ba la pynlong ha ophis u Deputy Commissioner WJHD.
Ka jingthmu ba hakhmat eh jong kane ka jingïakynduh jong ki heh District jong kine ki ar tylli ki District ka long ban ïatai bad wad ki lad ki lynti halor kumno ban pynduh katba lah ïa ki jingjia ïa kynad hapdeng kine ar District ha ki thaiñ khappud kiba la jia na ka por sha ka por.
Mynta ka sngi na ka liang ka West Karbi Anglong la wan ban mih khmat da ka Krishna Baruah Deputy Commissioner, SP bad uwei u Assistant Commissioner. Hadien ba wai ka jingïalang na ka liang ka DC Karbi Anglong kala ong ha kane ka jingïalang kin pyrshang ban wan rah ïa ka jingshong suk ha kitei ki thaiñ khappud katba lah da kaba sdang naduh tynrai, kala ong ha ka jingshisha ki briew sha kitei ki thaiñ ki dei kiba bha na baroh ar liang. Katba ha ka jingiadei bad ki jaka puta yn sa bishar kat kum ka map bad ka kum ka jingpyni jong ka map ka Khanduli ka dang hap hapoh ka District jong ki.
Katba na ka liang u DC WJHD bah B.S. Sohliya u la ong ba mynta ki don ar tylli ki regional Committee kawei jong ka West Karbi Anglong bad kawei jong ka West Jaiñtia bad kumba long mynta yn peit tang ïa ka aiñ bad kanun khnang ban nym mih kano kano ka jingjia ïa mynsaw ne jingïaum snam, hynrei haka jingïadei bad ki jaka ki puta ka shong ka bor haka regional committee.
Shuh shuh utei u khlieh duh ka District ula ong ha kane ka jingïalang na ka liang ki bor District ka Karbi Anglong kin sa ïa kynduh ïa ki dkhot ka Karbi Anglong Autonomous Council la shai ka sngi ban batai ïaki halor ka rai haka jingïalang ba la long mynta ka sngi ha Jowai.