Shillong, Ïaiong 19 : Ka tnad Tourism jong ka sorkar jylla ka la pynkhreh shaid shaid mynta na ka bynta ban pyntrei noh ïa ka Shillong Ropeway Project ha nongbah Shillong na ka bynta ban kh ring ïa ki nongwan jngohkai pyrthei.
U Myntri ka tnad Tourism, Bah Paul Lyngdoh haba kren bad ki lad pathai khubor u la ïathuh ba ïa ki tender na ka bynta katei ka projek kaba don ha Madan Laban – Lumparing – Lum Shyllong yn pyllait noh naduh u Jymmang mynta u snem katba ïa ka kam pat kin sdang noh naduh u Naiwieng mynta u snem.
“Kane ka projek kan don haduh 12 tylli ki cable bad ïa ka rukom pyntrei yn leh kumba leh ha dewbah Europe,” la bynrap shuh shuh u Myntri.
Ha kawei pat ka liang, u Myntri u la ïathuh ruh ba ïa ka projek jong ka Shillong International Centre for Performing Arts & Culture (SICPAC) kaba la plie naduh u snem ba la dep ym pat aiti satïa sha ka sorkar haduh mynta, kumta na ka liang jong u, un peit ba ïa katei ka projek dei ban aiti noh mardor.
Nalorkata, u ong ruh ba ïa ka kyrteng jong ka SICPAC kaban ngiam bun bha ki nongshong peitkai, yn sa pynkylla noh.
U Myntri u la ïathuh ruh ba ka tnad ryngkat ka jingïatrei lang bad ka Asian Development Bank (ADB), kin sa sdang ïa ki projek thymmai kylleng ka jylla da kaba sdang shwa ïa ka projek kaba 70 klur ha Shillong bad Sohra.
