Nongpoh, Ïaiong 19: Nalor kiwei kiwei ki mat ki jura ba ka Synjuk ki Rangbah Shnong ka Ri Bhoi mynta ka sngi ki la ïa tai ïa phylliew jongmut, kane ka synjuk ki Rangbah Shnong na Ri Bhoi ki la mih shakhmat ban pyrshah jur ïa ka jingpynmih hukum (Notification) ka KHADC ba la mana ban khanglad ïa ki Rangbah shnong ban don bynta ha ki kam sain hima sima.
Kum ka jingpyrshah ïa kane ka hukum ka KHADC ba dang shu pynmih shen ha ka 4 tarik u Ïaiong 2023, ka Synjuk ki Rangbah Shnong mynta ka sngi ka la lum da ka jingïalang kyrpang ban ïa kren bad ïa thir halor kane ka hukum ha ka jingïalang kaba la long mynta ka sngi ha Umsning.
Kumba la pynpaw da u Bah C.B Sylliang, Secretary ka Synjuk, u la ong ba ka Synjuk ka pyrshah jur ïa katei ka hukum ka KHADC ba la khang pyrshah ïa ki Rangbah Shnong ne ki nongïalam Shnong ban rung sha ka jylla ki kam sain hima sima bad kane ka jingpynmih ïa kane ka hukum kin nym lah ban pdiang da lei lei ruh.
U la ong ruh halor kane ka bynta ka Synjuk ka la rai ban leit ban ïa kynduh ïa u CEM ka KHADC, u EM ka Elaka, ka Hima Mylliem ban ïa kren halor kane ka mat bad kum ka synjuk ka pyrshah jur beit ha kaba kane ka jingpynmih hukum ka dei kaba khlem nongrim. Kawei na ka nuska kaba la paw ba wat ki nonghikai ki la shah khang ban ïakhun election, hynrei ki jop ha ka ingbishar ba ki la ïakhun pyrshah, hynrei ka KHADC kan khanglad aiu ïa ki Rangbah Shnong ne ki nongïalam shnong kiba ka khlem da siew tulop bad lada long kumta wat ki MDC ruh kim dei ban ïakhun MLA namar ki dei ki ba peit na ka bynta ban pynneh pynsah ïaka riti ka dustur bad ka khyndew ka shyiap.
Namar kata, na ka liang ka Synjuk kan nym pdiang da lei lei ïa kane ka jingpynmih kyndon ka KHADC ban khanglad ïa ki Rangbah shnong ne ki nongïalam Shnong ban don bynta ha ka politik bad na ka liang ka Synjuk ka dawa ruh ba kam dei ban buh kum kine ki kyndon bad lada ka pyntreikam ka synjuk kam banse ban shim da kiwei ki lynti ban pyrshah jur ban lum lang ïa ki nongïalam Shnong, Raid bad Hima, namar kane ka dei shisha ka jingpynmih kyndon kaba khlem da don shisha ka nongrim, u la bynrap.
Ha kane ka sngi la ïa kren ruh halor ka jingkiew palat ka dor register jaka ba la buh dor da ka sorkar ban register jaka, la ïa kren ruh halor ka kam pynbeit pud ba kito ki shnong Khasi ha Block II kim dei ban leit sha ka Assam bad kumjuh ruh la ïa kren halor ka jingpynlip bording ba dei ban pynjynsur ïa ka por ba ki paidbah ki mad jingeh. Ka seng ka dawa ruh na ka sorkar ba kan hap ban pyrkhat sani halor kitei ki jingeh bad ki jingdonkam jong ki paidbah, u la bynrap shuh shuh.
