Ki Seng Bhalang na Khasi bad Jaiñtia ki kwah nangne shakhmat, kiba na Garo ki kwah naduh 1972

Shillong, Iaiong 18 : Ka jingpyntreikam ïa ka Roster System ka la wanrah ka jingeh kaba khraw tam ïa ka sorkar MDA namar ki Seng Bhalang nangne na Ri Lum Khasi bad Jaiñtia ki kwah ban pyntreikam ïa ka nangne shakhmat katba ki Seng Bhalang ha Ri Lum Garo ki kwah ban pyntreikam naduh u snem 1972.
Ha ka jingshisha ban da dei ba ka ïing bishar ka pdiang ïa ka jingkyrpad ka sorkar naduh kaba sdang ban pyntreikam beit nangne shakhmat katta yn ym mih ki jingeh hynrei namar ka ïing bishar ka banjur ïa ka sorkar ban pyntreikam beit naduh ba sdang ïa ka Reservation Policy mynta ka buh ïa ka sorkar ha ka jingeh. Haba la sdang khih win ka jylla halor kane ka kam ka ïing bishar ka rai pat ba dei ban shim rai halor kane ka kam da ka ïing Dorbar Thawaiñ ka jylla bad da ka sorkar.
Kumta ka sorkar mynta ka hap ban shong bad ïatai sani bha halor kane ka kam khnang ba kan ym ktah ïa ka jingsngew jong kano kano ka jaidbynriew hapoh ka jylla bad ba kan ym wanrah ka jingthut ïa ka shongsuk shongsaiñ namar tang bakla tiak tang katta ka jingma ka la ap lypa namar ka jingkyan ka jur bha napoh napoh halor ka Roster System.
Ki don ki Seng Bhalang kiba kwah ban bishar bniah biang ïa ka Reservation Policy ki don pat ki bym kwah ban ktah ïa kane ka bhah thung kam thung jam.
Lah ban ong ba na ka liang ki seng saiñ pyrthei ruh ki kwah ban ïa bishar bniah halor kane ka polisi thungkam thung jam da kaba bishar bniah sani bha khnang ba kan ym ktah ïano ïano ruh.
Na ka liang u President ka VPP u bah Ardent Basaiawmoit u la pynpaw ba kum ka party kim pyrshah ïa ka Roster System hynrei ka jingeh ka dei ka Reservation Policy. “ Ngim pyrshah ïa ka Roster System hynrei dei ban pynsangeh shwa ban pyntreikam ïa ka katba ym pat dep bishar bniah ïa ka Reservation Policy namar ngi don ka jingeh na kane ka polisi ym na ka roster system” ong u bah Ardent.
Na ka liang ka sorkar ruh kat kum ba ïoh jingtip bad ïathuh ba ka dang ïai bishar bniah bha ïa kane ka kam shwa ban lum ïa ka jingïalang jong ki seng saiñ pyrthei bad kiwei kiwei ki kynhun ruh.
Na ka liang ka KSU ka la dawa ïa ka sorkar ba kan pyntreikam ïa ka Roster System nangne shakhmat. “ Ka nongrim ba ka KSU ka ïeng ka long ba ka sorkar kam dei ban pyntreikam naduh u snem 1972. Namar lada ki pyntreikam naduh une u snem kan ktah jur ïa ki paid Khasi bad Jaintia ban ïoh kam ïoh jam kumta ka KSU ka dawa ban pyntreikam beit nangne shakhmat” ong u President ka KSU u bah Lambokstarwell Marngar.
Na ka liang ka KHNAM ruh ka dawa ba dei ban bishar bniah ïa ka Reservation Policy bad pynsangeh shwa ban pyntreikam ïa ka Roster System katba ym pat lah ban ïa pynbeit.
Ka HNYF ka dawa ba dei ban pyntreikam beit nangne shakhmat bad ha kajuh ka por ka dawa ruh ba dei ban bishar bniah biang ïa ka Reservation Policy. U President ka HNYF u bah SK Blah u la ong “ Kat kum ka riti synshar ka ri ka Reservation Policy ka dei ban long tang 10 snem bad kat kum ki rai jong ka ïing bishar Supreme Court kim dei ban palat ia ka 50 % ka jingïoh bhah kumta lada mushlia bad wanrah ka jingpynkylla ka lah ban khring ïa ka ïing bishar ban tuklar ïa kane ka kam. Kumta ula kyntu ba dei ban bishar bniah ïa ki rai jongka Supreme Court shwa ba ïa tuklar ïaka Reservation Policy.
U President ka FKJGP u bah Dundee Khongsit u la ong ba ïa ka bhah thung kam thung jam jong ki paid Khasi-Jaintia bad Garo ym dei ban ktah namar lah ban duh pynban lada ktah ïa kane ka kam.
Na ka liang u Vice President ka AITC bad MLA ba rim ka Umroi u bah George B Lyngdoh u la maham lypa lada jia ba bakla ban shim rai halor ka Reservation Policy namar lada bakla kan mih ka jingbym ïasngewthuh jingmut kaba jur hapdeng ki paid Khasi, Jaintia bad Garo. U la ong ka sorkar ka dei ban pynshai sha ki paidbah balei naduh ba sdang ka pyntreikam naduh u 1972 bad mynta ka pyrkhat ban pyntreikam nangne shakhmat.