Sa tang shipor ar por kan kut ka jingïakynduh jingeh ki paidbah na ka jinglip bording: Sanjay Goyal

Shillong, Ïaïong 19: U Managing Director jong ka Meghalaya Energy Corporation Limited (MeELC) u Sanjay Goyal ha ka sngi Balang u la ong ba ka jingïakynduh jingeh ki paidbah na ka jinglip bording da ki bun bun kynta ha ka shi sngi yn sa lah ban weng noh ha kine ki khyndiat sngi kiban sa wan.
“Nga kular ba ngin pynbha ïa ka jingai jingshakri jong ngi bad kane ka jinghap pynlip bording bun kynta kan sa kut noh hi shen tang ha kine ki shipor arpor ban sa wan,” ong u Goyal haba kren sha ki lad pathai khubor.
“Ngi khmih lynti ba ka jingpynmih bording kan wan ruh na kiwei kiwei ki tyllong hynrei kane kam lah ban jia noh marmar. Lehse ha kine ki khyndiat sngi kiban sa wan ba ka jingpynmih bording na Leshka kan bteng biang ha kine ki sngi ban sa wan bad ngi kyrmen ruh ba ngin sa ïoh slap ha kine ki sngi ban wan bad ha kata ka por kane ka jingeh yn lah ban weng noh,” u la bynrap.
U Goyal u la kyntu ruh ïa ki paidbah ka jylla ba kin shah shitom lang bad ong ba na ka liang ka tnat ka la pyrshang ïa kaba bhatam ban weng ïa kane ka jingeh.
U la ong ruh ba ka jinghap ban pynlip bording ka dei namar ka jingpynmih bording ka duna bunshah ban ïa ka jingdonkam.
“Ka jingdonkam bording ka dei malu mala 250 MW hynrei ngi lah ban pynmih bording tang kumba 170 MW eiei kaba kynthup naduh kaba pynmih ka jylla bad kaba ïoh na kiwei ki kompeni pynmih bording ba kynthup ïa ka NEEPCO, NTPC” u la ong.
Shuh shuh u la ong ba ka tnat ka la pyrshang ban thied bording na ki kompeni pynmih bording hynrei na ka daw ka jingrem palat ka tnat ka hap randien noh.
U la ong ruh ba ka jingduna um ha the Myntdu Leshka Hydro Electric Project bad kumjuh ka jingdon um ha Umïam ruh ka la duna shaba palat.
“Ngi hap thied bording wat ha ka dor 8 tyngka katba ha ka jingshisha ka dor ka dei malu mala kumba 4.5 tyngka shi unit kaba mut ngi hap ban siew tam na ka pla ka tnat kumba 3 tyngka,” u la ong.