50 tylli ki snem la pyntreikam bakla ïa ka Reservation Policy kam long kaba suk ban pynbeit mar mar : Paul Lyngdoh

Shillong, Ïaïong 19: U Working President ka United Democratic Party bad uba dei ruh u Myntri ka sorkar MDA 2.0 u Bah Paul Lyngdoh ha ka sngi Balang u la ong ba lada peit na ka jingjop jong ka UDP kaba la pynrung ha ka jingkular elskhon ban pynkylla thymmai ïa ka Reservation Policy tang 11 na ki 36 tylli ki seat ha Ri-lum Khasi- Jaintia ka pyni ba ki nongshnong shnong jong ki 25 tylli ki constituency kim kwah satia ban pynkylla ïa kane ka polisi bhah kam.
Haba kren sha ki lad pathai khubor u Bah Paul u la ong ba ha ka jingshisha ka UDP ka la buh thong ba ka Reservation Policy dei ban pynbeit thymmai namar kiba bun ki jingduna jong ka bad ka la pynrung ruh ïa kane ka mat ha ki kular elekshon ka party hynrei ka jingbym jop mki kyrtong ka la dei ka juubab kaba shai ba kiba bun hi kim kwah jingpynkylla ïa kane ka polisi.
“Ngi pynïakhun na ki 60 tylli ki constituency 46 hynrei ngi jop tang 11 bad lada kheiñ tang ki bynta ka Ri-lum Khasi ngi pynïakhun 36 ki pynjop tang 11 bad kane ka pyni ba kiba bun hi ki nongshong shnong wat ha ki 36 kim kwah ban pynkylla thymmai ïa kane ka polisi bhah kam namar lada ki kwah pynkylla ki la dei ban pynjop khambun ki MLA na ka UDP kaba la buh thong ïa kane ka mat,” ong u Bah Paul.
“Lada ngi kheiñ lang ïa ka jingjop ka UDP bad ka VPP na ki36 tylli ki seat kiba don ha Ri-lum Khasi ki dang don 15 ngut ki MLA bad kaba mut hi ba na ki 36 tylli ki constituency 21 kim kwah pynkylla hynrei tang 15 kiba kwah, kane ka la pyni shai ba uba bun balang u kwah ba kane ka polisi kan neh kumba ka long,” u la bynrap.
Haba ïadei bad ka jingnang jur ka jingdawa pynkylla ïa kane ka bhah thungkam u Bah Paul u la ong ba namar ka dei ka jingleh lymmuh bad ka jingpyntreikam bakla kaba la jia naduh ki 50 snem kiba la leit kam dei ka kam kaba suk ban pynbeit noh tang ha ki san sngi ne san bnai.
“Ka dei ka jingshisha ba ka la dei ka jingleh lymmuh bad ka jingpyntreikam bakla naduh 50 snem mynshuwa ha ka por ba saiñdur ïa kane ka polisi, na kata ka daw kam dei ka kam kaba suk ban pynbeit noh tang ha ki 5 sngi ne 5 bnai,” u la ong.
Haba kylli ïa ka jingdkoh kaba don ha kane ka polisi, “Lada phi peit ha ka polisi kiba bun bah ki jingdkhoh bad jingleh lymmuh, namar lada phi peit ka jingailad ban rah ïa ki post haduh 2-3 snem ka la dei kawei na kita, lada ha ka ophis donkam ban pyndap 12 ngut ki nomgtrei hynrei namar kim lah pyndap hap ap haduh u snem uba lai bad ha kine ki lai snem ka ophis kan dkoh bha ka rukom treikam namar ka jingduna ki nongtrei,” u la jubab.
Shuh shuh u Bah Paul u la ong ba lada leit sha kashari ban ujor mokotduma ïa kane ka polisi ka lah ban buh jingmja pynban ‘na kata ka daw baroh ngi dei ban husiar bha ïoh ba kan long pynban kum ka jingsiat ïap da lade ïa lade,’ u la ong.
Haba ïadei bad ka Roster System bad ka jingmih ki jingdawa na ki bynta ka Ri-lum Khasi ban pynkylla katba na Ri-lum Garo ban pynneh beit ïa ka jingpyntreikam da kaba phai dien shaduh u 1972, “Na ka liang ka sorkar ngi ïathir sani ïa kane ka kam ha ka jingïalang ka Kynhun Myntri kaban long ha ka taiew ban wan,” ong u Bah Paul.
Haba kren halor ka jingsngew pyrshah kaba mih khamtam na ri-lum Khasi ïa ka jingpyntreikam ïa ka Roster da kaba phai dien shaduh u 1972, “Ka dei kaba shongnia bad na ka laing jong nga ngan rah ïa kane ka mat ha ka jingïalang ka Kynhun Myntri ba dei ban pyntreikam beit shakhamt naduh ba la mynjur ym ban pyntreikam da kaba ïaid shadien. Kumba long mynta ki don lai tylli ki lad ban weng ïa ki soh kyrdot halor ka Roster kaba nyngkong ban pynbeit da ka Kynhun Myntri, kaba ar ban leit sha Supreme Court bad kaba lai ban rah ha Assembly bad na kine ali ngin hap shim ïa ka lynti kaba dei eh ha kaba ïadei bad kane ka kam,” u la bynrap.