Shillong, Ïaïong 20 : Ka Sacred Heart FT Academy ka la shah pynbam da 0-7 kol ha ka Umphyrnai SC ha ka lympung ïalehkai phutbol Under-10 (Boys) Football League 2023 ba pynïaid da ka Shillong Sports Association (SSA).
Ha ka jingïalehkai kaba la long ha ka sngi Palei ha madan Second Ground, Polo, Shillong u heprit B. Kharkongor u la khyrwit marwei 4 kol. Ha kane ka jingïalehkai, u B. Kharkongor u la thep ïa kitei ki saw kol ha ka minit ïalehkai ba 9, 12, 17 bad 30, u F. Mawlong bad u C. Kharkongor ki ïarap thep mar shi kol ha ka minit ba 33 bad 48 katba ïa ka shi kol la ïoh ei na ka jingthep bakla (own goal) na u B. Kharthangmaw ha ka minit ïalehkai ba 10.
Ka jingïalehkai jong katei ka lympung kan sa long pat ha ka 22 tarik Ïaïong 2023 (sngi Saitjaiñ) ha kaba kin don sawsien ïalehkai. Ka Pay For Right FT Academy kan ïakhun pyrshah ïa ka Mylliem Grass Root ha ka jingïalehkai kaba nyngkong ha ka por 11:00 baje mynstep.
Ka Sacred Heart FT Academy kan ïakhun pyrshah ïa ka Rangdajied United FC ha ka por 12:30 baje nohphai sngi, ka Mawlai SS&CC kan ïakhun pyrshah ïa ka Kick Start FT Academy ha ka por 2:30 bad ka Kynton U Mon kan ïakhun pyrshah ïa ka Summit Academy ha ka jingïalehkai kaba khatduh ha ka por 4:00 baje janmiet.
