Shillong, Ïaiong 19 : Katba ka UDP ka dang shaniah ha ka vote sngewsynei ban jop ïa ka elekshon MLA kaban long shen na Sohiong constituency, na ka liang ka NPP pat ka la kam ba katei ka vote sngewsynei kan ym lah satia ban thaw pyrthei ha katei ka elekshon jied nongmihkhmat thymmai kaban long ha ka 10tarik u Jymmang mynta u snem.
Lah ban kdew hangne ba ïa ka elekshon jied MLA ha Sohiong la hap ban pynsangeh shwa na ka daw ka jingkhlad kyndit noh u kyrtong ka UDP, Bah HDR Lyngdoh khyndiat sngi shwa ka elekshon.
Da kaba pynskhem ïa ka nongrim, u President ka NPP, Dr. WR Kharlukhi u la ong haba phaidien ïa ki elekshon shiteng samoi ba la dep ka vote sngewsynei kam treikam satia ha Rajabala, Selsella bad ruh ha Umroi. “Te halor kaei ka nongrim ba ngi ïa kren sa ïa kum kitei ki phang?”
Ha u 2021 ka elekshon shiteng samoi ha Rajabala, ka Congress kam shym la lah ban jop biang hadien ba u MLA ka Congress, u la khlad noh. Hynrei ha ka jaka jong u la jop noh da u kyrtong ka NPP u Abdus Saleh. Kumjuh ruh ha ka elekshon shiteng samoi ha u 2019 ha Selsella hadien ka jingkhlad noh jong u MLA ka Congress Clement Marak, ka Ferlin CA Sangma jong ka NPP ka la jop da kaba pynliem noh ïa ka kurim jong utei u MLA ba la khlad noh.
Shuh shuh la kdew ruh ba ha ka elekshon shiteng samoi ha Umroi ha u 2008 hadien ka jingkhlad noh u Bah EK Mawlong jong ka UDP, ka vote sngewsynei kam shym la treikam namar ïaka jingjop la ïoh da u Bah Stanlywiss Rymbai jong ka Congress.
“Ka politik kadei kaba kham phylla. Ka vote sngewsynei bad ka vote hiar pateng kam ju treikam. Kumta ha kane ka khep ruh, halor kaei ka nongrim katei ka lyer sngewsynei kan treikam haba u Kni (Bah HDR Lyngdoh) u la shah pynliem noh ha ka HSPDP (Bah Samlin Malngiang) ha u 2018 da ka jingïarap jong u pyrsa jong u hi. Mynta pat da ujuh u pyrsa (Synshar Kupar Lyngdoh Thabah) u ïakhun na ka tiket UDP da kaba khmih lynti ïa ka vote sngewsynei na ki nongkyrshan,” u la ong.
U pyrsa jong u (L) Bah HDR Lyngdoh, Bah Sysnhar Kupar Lyngdoh Thabah un hap ban aireng pyrshah ïa u kyrtong ka NPP, Bah Samlin Malngiang ba dei ruh u MLA barim ka HSPDP uba la pynliem ïa u Bah HDR ha ka elekshon MLA 2018. Kiwei pat ki kyrtong kiba aireng ha kane ka elekshon ki kynthup naduh naduh ka Congress, BJP bad ruh na ka TMC.
