Ka sorkar kan sa shong pyrkhat bha halor ka Reservation Policy : Sniawbha

Shillong, Iaiong 19: U Symbud Myntri Rangbah ka jylla Bah Sniawbhalang Dhar ula ong, “Wat khuslai ka sorkar jylla kan sa pyrkhat bha ha kaba ïadei bad ka Reservation Policy”.
Haba kylli la u kyrshan ne u pyrshah ïa ka jingdawa ba dei ban pynkylla thymmai noh ïa ka Reservation Policy, u Bah Sniawbhalang uba long ruh u nongïalam ka NPP, ula ong, “Ka jingkylli la yn kyrshan ne ym kyrshan kam mih satia, namar ka sorkar kan hap ban sngap ïa uba bun balang bad ka sorkar synroplang kan sa lum ïa ka jingïalang jongka kynhun Meghalaya Democratic Alliance (MDA) bad u Myntri Rangbah ka jylla un sa shimkhia halor kane bad u lah ruh ban lum ïa ka jingïalang bad baroh ki seng saiñ pyrthei”.
Haba kylli kum u Nongïalam na rilum Jaiñtia u sngew kumno halor kane ka jingdawa, u Bah Sniawbhalang ula ong, “Ngi dei ki nongïalam jong ka Jylla baroh kawei bad nga dei u Symbud Myntri Rangbah ka jylla ym tang jong ki paid ka rilum Jaiñtia hynrei ïa baroh kumjuh la ki dei na Jaiñtia, Khasi ne Garo namar ngi don hangne ban shakri ïa u paidbah”.
Haba kylli la ka seng NPP ka don jingthmu ban khroh ïa u MP ka Lok Sabha u Bah Vincent Pala ban ïakhun ïa ka elekshon MP ban wan na ka seng NPP, u Bah Sniawbhalang ula ong, “Ka dang don ka por sa shisnem ban long ka elekshon MP, balei phi kyrkieh ban tip noh, ka por kan sa batai kaba ka parti kan sa shim ïa ka rai mano ban long u kyrtong ha katei ka elekshon”.Haba kylli la kadei ka jingshisha ba lyngba ka jingshimkhia ka jongu ba ki la pyrshang ban khring ïa ki MLA ka PDF ban pynïasoh noh bad ka NPP, u Bah Sniawbhalang ula ong, “Kadei ka jingshimkhia jongka seng lada ka don kum katei namar nga ruh ngam don jingtip eiei.
Haba kylli lano kitei ki MLA kin pynïasoh noh bad ka NPP, u Symbud Myntri Rangbah ula ong, kan bha lada kylli hi na ki, namar lada phi kylli ïa nga, nga te nga kwah ba kin wan ban pynïasoh noh mynta ka sngi hi.
Ula ong ruh, ba ka NPP kam shym la kren eiei ïa ki MLA ka HSPDP ba kin wan pynïasoh noh bad ka NPP hynrei lada ki MLA ki kwah ban wan pynïasoh hi, ka seng ka long kaba kloi ban pdiang ïa ki. Haba kylli lada don kiba wan ban pynïasoh noh bad ka NPP, hato kin don kino kino ki seng saiñ pyrthei kiban hap iehnoh ïa ka shuki Myntri ka jongki, u Symbud Myntri Rangbah ula jubab da kaba ong, “Em, kiei kiei baroh kin neh beit kumba ki long, ka MDA –II ka long kaba khlaiñ bha wat nym khuslai”.