Byrngem ka UHACF ban mudui ha HC lada ym wad lad ka Sorkar shwa ban bthei ka Dam

0

Shillong, Ïaiong, 19: Ka Umïam Hazard Area Collective Forum (Adhoc) ka la byrngem ban leit tied ïa ka jingkhang jong ka Iingbishar Meghalaya High Court lada ka Sorkar Jylla kam wad ïa ki lad ki lynti kiba shngaiñ na ka bynta ki paidbah nongshong shnong ha them Ribhoi Mihngi shwa ba ka jingkieng ha Damsite ka lah ban bthei ha kano ma kano ka por.
Ka Umïam Hazard Area Collective Forum (Adhoc) ka dei ka kynhun kaba la pynkha da ki riew Rangbah, ki longkmie, ki samla bad ki nongsynshar Shnong bad Raid bad kiwei kiwei.
“La pynmih ïa kane ka kynhun dei namar ka jingsngewkhia halor ka Dam Umïam kaba la tor bad la duna ka jingskhem kaba la buh ïa ka jingim jong ki nong shongshnong jong ka thaiñ Ri-Bhoi Mihngi ha ka jingsyier bad ka jingma kaba khraw khamtam ïa kito ki shnong kiba ka wah umïam ka ïaid lynti,” ong u kyrwoh ba la phah da u dei u General Secretary u Bah Hilary Shadap.
Haba pynpaw ïa ki daw kiba shongnia, ka Forum ka la ong, “ka jylla Meghalaya ka dei ka jylla kaba don ha ka Seismic Zone-5. Ka jylla Meghalaya ka la mad ïa bun ki jumai kiba rit bad kiba jur bor ruh kumjuh. Uwei na kita ki jumai u dei u jumai ba la khie ha u snem 1897 ha kaba ki jingduh ïa ka jingim briew ka tam ïa ka 1,500 ngut bad kaba kham shen ka dei ka jingkhyniuh jumai ha u snem 2016 uba la kot haduh 6.8 Richter Scale kaba la jia ha ka jylla Meghalaya. Ka jingkhyniuh jumai kaba lah ban khie ha ki Zone-5 ka lah ban kot ruh haduh 8 Richter Scale. Ka jingdon jong kane ka dam kaba la rim bad kaba la tlot bor, ka pynshong syier ïa ki nongshong shnong jong ka Ri-bhoi mihngi khamtam ha ka por lyiur ha kaba jur bha u slap.”
“Katkum ka kaidphod jong ka NIPEP ka ïathuh ba ki la don haduh 23 tylli ki jingjia ha kaba ka dam ka bthei (dam failure) ha ka ri India naduh u snem 1960-2010 ha kaba la don buh bha ka jingduh mynsiem briew bad ngim kwah ba kan jia ruh kumjuh ha ka jylla Meghalaya jong ngi,” la ong ka Forum.
“Kum ka seng, ngi lah phah jingthoh sha ka Sorkar ban pan jingtip halor kiei kita ki sienjam kiba ka sorkar ka lah leh lane pynkhreh lypa na ka bynta ki nongshong shnong jong ka Ri-Bhoi Mihngi lada ka bthei ka Dam Umïam, lyngba ka RTI,” la ïathuh ka Forum bad bynrap, “ha u snem 2014 ka la don ruh ka Public Interest Litigation (PIL) ha kaba ka Meghalaya High Court ka la khang ïa ka jingtei High Rise building ha ka jylla namarba ka hap hapoh kata ka Seismic Zone-5 ha kaba lah ban khie u jumai uba jur.”
“Ha ka por ba pyllait um na ka Dam Umïam ka la ktah shikatdei ïa ki jingthung jingtep kum ha ka shnong Umtngam, Tyrso bad kiwei kiwei ruh ki shong kiba marjan, hynrei ha ka por ba leit wad jingïarap na ka Sorkar na ka bynta ka jingjot bad jingduh noh ïa ki jingthung jingtep ha ka por ba pyllait ïa ka um na ka Dam Umïam, ki paid nongshong shnong kiba la shah ktah ki la ïathuh ba ka jingïoh jingïarap jong ki ka dei tang ha ka dor T. 1,500 haduh T. 2,000 bad ka jingïoh jingïarap kam ïahap shuh bad ka jingjulor ki jingthung jingtep,” la kren diaw ka Forum.

Leave A Reply

Your email address will not be published.