Nongstoiñ, Jymmang, 3: Ka jingpynmih jong ka National Green Tribunal ïa ka hukum ban khang ïa ka jingtih bad shalan dewïong napoh ka jylla, ka dang duna satang khatsaw sngi ban dap khyndai snem thik. Hynrei shuwa ban kynjoh sha ka khyndai snem, ki kyndon ban khang ïa ka jingtih bad shalan dewïong ki la sdang ban synjor khyndiat pa khyndiat bad mynta ka sngi ka jingkhang ka la sdang ban plie, ha kaba u Conrad Kongal Sangma Myntri Rangbah ka jylla dalade u la hiar sha Nongstoiñ ban pynbna paitbah ba la ïa ka jingtih bad shalan dewiong ka sorkar ka la la pyllait noh.
Na ka bynta ka jingwan jong u Myntri Rangbah ban pynbna ïa ka jingpyllait ban tih dewïong, la pynlong ha Madan jong ka shnong New Nongstoiñ ha kaba ki nongmihkhmat u bah Methodius Dkhar MLA ka Mawshynrut, u bah Gabriel Wahlang MLA ka Nongstoiñ ki heh sorkar jong ka West Khasi Hills district bad ka jylla ba kynthup ïu bah E.Kharmalki Secretary jong ka Mining Department Government of Mehghalaya, u bah P.D.Sangma Director jong ka Directorate of Mineral Resources, u Chakraborty u heh ba dei peit ïa ka Mining & Geology, ki arngut ki rangbah u bah Teilang Pde na East Jaiñtai Hills bad u bah Shingstar Khardewsaw na West Khasi Hills bad ki paitbah ki la ïa don ryngkat.
Ha katei ka sngi la ïoh ruh ïa ka jingpynshai lyngkot ha kaba ïadei bad ka jingïaleh ban pyllait ïa ka jingkhang jong ka NGT ban tih bad shalan dewiong naduh ba sdang haduh mynta. Nalor kata la ïoh ruh ïa ka jingkren na u bah E.Kharmalki, bah Garod L.S.N Dykes Deputy Commissioner ka West Khasi Hills bad na ki ar ngut ki rangbah kiba ka sorkar ka la ai jingbit ba kin tih dewïong.
Haba ai jingkren u Conrad Kongal Sangma Myntri Rangbah ka jylla, u la ong ba wat ka la sorkar ka la shah ban tih bad shalan dewïong ruh ka jingtih ka dei da ka rukom tih ba thymmai katkum ka juk stad saïan kaba mynta bad dei tang kito kiba la ïoh ïa ka minging licence ki lah ban tih dewïong wat la katta ruh ka la long ka jingkyrkhu kaba khraw ïa ki paitbah.
U la ong ruh ba ha kine ki khyndai snem ba ka sorkar kam pat shah ban tih bad shalan dewïong, ki paitbah ka jylla ki la mad shibun ki jingeh, ka kamai kajih ka la hiar arsut, ka ïoh ka kot ka la hiar ka pla pisa jong ka sorkar ka la thylli, bun ki samla kiba leit pule shabar ki hap ban wan phai noh sha ïing, namar ki kmie ki kpa kim lah shuh ban kyrshan ïa ki.
Dei halor kata ka nongrim ba ma u kum u Myhtri Rangbah ka jylla ryngkat ka sorkar jong u, ki la hap ban trei shitom ban ïasaid bad ka sorkar pdeng bad kyrpad ba kan shah noh ban tih dewïong bad mynta ka la urlong.
Nalor kata u Myntri rangbah u la ong ba wat la ka sorkar ka la ai jingbit ïa kitei ki ar ngut ki rangbah ban sdang ïa ka jingtih dewïong ruh, kan dang shim por sa kumba katto katne namar ki dang hap ban pyndep ïa ki kot ki sla kiba ïadei bad ka sorkar bad hadien ba ki la dep pynbiang lut kin sdang noh ban trei.
U la ong ruh ba ki dang don sa kumba khatsaw ngut kiba la dep ban aplai mining license, hynrei kim pat lah ban pyndep bad ka jingpynbit pynbiang jong ki ïa ki jingdonkam, ka dang ïaid shait shait bad kin sa pyndep uwei hadien uwei pat.
