Hiar u Symbud Myntri Rangbah sha Rambrai ban pynshai paitbah ïa ki mat ïaleh Election ka NPP

Nongstoiñ, Jylliew 04 : Wat la ka Election Commssion jong ka ri India kam shym pat la pynbna ïa ka tarik ban ïaleh ïa ka MP Election shiteng samoi na ka Shillong Parliamentary constituency hynrei kum ka jingpynkhreh ki nongïalam jong ka National Peoples Party mynta ka sngi palei ka 4 tarik Jylliew ba kynthup ïa u bah Prestone Tynsong Symbud Myntri Rangbah ka jylla uba dei ruh u president jong kaparty , u bah Hamletson Dohling Working president ka party, bah Gabriel Wahlang MLa ka Nongstoiñ constituency , bah Himalaya M Shangpliang nongai ktien ka party bad kiwei kiwei ki nongïalam ba ha khmat ki la hiar sha ïew Rambrai ban pynshai paitbah ïa ki mat trei kam jong ka party .Ha katei ka sngi la pynlong ïa ka jingïalang ha kaba la pynïaid da u bah Makdonal Lyngdoh sordar jong ka shnong Rambrai . Ha katei ka sngi la ïadon lang da u bah R.G.Momin MLA ka Rambrai Jyrngam, u bah Lurshai Kharbani MDC u bah Gikur Myrthong president ka NPP West Khasi hills district , u bah Bormanding Nonglang working president ka NPP West Khasi hills ki riew rangbah na ki shnong bapher bapher ki longkmie bad ki paitbah na kylleng ki shnong jong ka thaiñ.
Ki nongkren ba kongsan kiba la ai ka jingpyshai ha katei ka sngi ki long u bah Hamaletson Dohling , u bah Gikur Myrthong, bah R.G.Momin MLA ka thaiñ, bah Lurshai Kharbani , bah Bormanding Nonglang bad khatduh eh la ïoh ïa ka jingpynshai paitbah na u bah Prestone Tynsong symbud Myntri Rangbah ka jylla.
U bah Hamletson Dohlin haba pynshai sha ki paitbah ha katei ka sngi u la ong ba ka jingkiew sted jong ka roi ka par hapoh ka jylla ka dei namar ba ka sorkar MDA kaba la ïalam da ka National Peoples Party ka don ïa ka jingkitkhlieh na ka bynta ban kyntiew ïa ki paitbah ha baroh ki liang khamtam eh ban pynsuk ïa ka leit ka wan , ka kit ka bah da kaba pynïoh ïa ki surok kiba bha ha kylleng ki jaka. Ha kajuh ka por u la ong ba lada ïanujor ïa ka jinglong jingman jong ki shnong ki thaw ha kylleng ki jaka ym lah ban len ba naduh ba ka NPP ka la ïoh lad ban ïalam ïa ka sorkar ka la don ka jingkylla ha baroh ki liang , ki shnong ki thaw ki la nangkiew ha ka ïoh ka kot ka leit ka wan ka la sted bha namar ka jing lah jong ka sorkar ban pyntrei ïa ki surok bad k lynti ki synkien.Nalor kata u la ong ban a ka liang ka NPP ka kwah bad ka angnud ba ki paitbah kin ai ka jingkyrshan ba pura ha kane ka MP Election shiteng samoi ïa u Dr D.R.L.Nonglait uba ka party ka la tynrong ha u ïa ka kam ba un leit ban mihkhmat sha ka Dorbar Lok Sabha ban pynsgew sha ka sorkar India ïa ki mat kiba don kam jong ki paitbah ka jylla.
U la kyrpad ruh ïa ki paitbah ka Rambrai Jyrngam constituency ba haba ki jied ïa ki nongmihkhmat ki dei ban da pyrkhat sani bad puson bniah ym ba ki jied da ka jingshongshit lane ba kin shah ïalam bakla da ki tien jail jaum jongno re namar lada bakla ban jied ka jylla kan ym lah ban kiew lano lano ruh.
Ha kaba khatduh la ïoh ïa ka jingpynshai na u bah Prestone Tynsong symbud Myntri Rangbah ka jylla. U bah Tynsong haba pynshai sha ki paitbah ha katei ka sngi u la ong ba ka NPP ha kane ka kynti ka la sei ïa u Dr .D.R.L.Nonglait rangbah uba kynsai tam uba la biang pura ha ka jingnang jingstad , uba don ruh ka jinglong kaba sngewrit bad uba baroh ki nongshong shnong jong ka West Khasi hills distrct ki la ithuh bha ïa u. U la ong ruh ba ka jingkohnguh jongu Dr.Nonglait ba un long kum u kyrtong jong ka party ha kane ka Election MP shiteng samoi ka ban sa long shen ka long ka jingkyrkhu kba khraw ïa ki paitbah ka jylla.
Ha kajuh ka por u la kyrpad jur ïa ki paitbah ba kin pyrlkhat bha bad ba kin ai ka kti kamon , kadiang ban kyshan bad pynjop ïa u namar lada un jop un leit sha Delhi ban pynsgew sha ka sorkar ïa ki jingeh ba ka jylla ka ïakynduh. Nalor kata u la ong ruh ba lada u Dr.Nonglait un jop ka long ka kabu kaba khraw ba un pynsngew sha ka sorkar India ba kan pynrung noh kloi ïa ka ktien Khasi ha ka Khyrnit kaba phra jong ka Riti synhar, un pynsgew ruh sha ka sorkar India ba ka dei ban pyntrei kam noh kloi ïa ka Inner Line Permit kaba dei ka aiñ kaba skhem bha ban ïada ïa ka jylla na ka jingshah tyllep ha ki brieew kiba wan na shabar .Khatduh eh u la kyntu ïa ki paitbah ba kim dei ban ngeit klumar ïa ki khubor kiba la pynsaphriang ha ki rynsan social media hynrei ki dei ban da bishar bniah kano kba dei kano kaba lait , kano kaba shisha bad kano ka bym shisha namar lada shu ngeit klumar kin shah ïalam bakla ha kiba bun ki liang.