Kham lah ka Mylliem Constituency ban ïa ka shuki MP Rajya Sabha ha Delhi : Bah Hamlet Dohling

Shillong, Jylliew 04 : U State Working President ka National People’s Party (NPP), u Bah Hamleston Dohling, u la ong ba ka jingkyntait jong u ïa ka jingtyrwa ban leit kum u MP ka Rajya Sabha sha Delhi kadei namar u dang kwah ban pynleit jingmut ban trei na ka bynta ka bit ka biang jong ki paidbah ka Mylliem constituency bad kumjuh ha ka jylla.
Haba kren sha ki lad pathai khubor, u Bah Hamlet Dohling u la pynthikna ba ka kyrteng jong u ka dei kawei na kiba la jingïakren da ki nongïalam ba hakhlieh duh ka party halor ka elekshon Rajya Sabha.
“Ka long kaba shisha ba ka kyrteng jongnga ruh ka la paw. Kumta, nga la ïakren bad u National President, u Conrad K. Sangma, bad u State President Bah Prestone Tynsong, halor ka kam Rajya Sabha. Nga sngewnguh ïa ka jingshaniah ba ki nongïalam ka party ki don ha nga, hynrei nga la pyntip sha ki ba ngam pat long uba la pynkhreh ban leit sha Delhi bad ngam don jingthmu ban shim ïa katei ka bynta ha kane ka por,” u la ong.
Shuh shuh u ong, “Nga dang kwah ban pynleit jingmut ha kaban shakri ïa ki paidbah hangne namar dang bun ki kam kiba dei ban leh. Don bun ki jingdonkam bad ki jingeh kiba donkam jingïarap, bad nga sngew ba ka dang kloi palat ïa nga ban leit shawei. Ka jinghikai bad ka jingkitkhlieh jong nga mynta ka long ban pyndep bha shwa ïa ki kamram jong nga hangne,” ong u Bah Hamlet ba dei ruh u MLA barim ka Mylliem.
Kum u nongïalam ka NPP u la ong ruh ba lyngba ka jingïaid lynti jong u ha ka saiñ pyrthei, u la nang sngewthuh kham bha ïa ki mat bapher bapher kiba ktah ïa ka Meghalaya bad ïa ki trai jylla.
“Ngi la ïohi bad mad bun ki jingeh kiba ïadei bad ki mat kiba ktah ïa ki paidbah jong ngi. Ha ka jingsngew jong nga, ka jingkitkhlieh ka dang khraw bha, bad nga sngew ba ki nongïalam kiba la rangbah ki dei ban ïoh lad shwa.”