Naduh ba khang dewïong ngi la shah thngan ong u MLA da kaba ïaroh ïa u samla ba shah thngan

Shillong, Jylliew 04 : U MLA ka UDP na Khliehriat uba dei u Adviser ka tnad tnat Mining, u Bah Kyrmen Shylla pynpaw ba ka jingshah thngan jong u Bah Marshal Biam ka dei namar ka jingkutlad, namar ka jingkhmih lynti la slem ban plie noh ïa u dewïong.
Haba ai ka jingïaroh ïa ka jinglen lade bad jingnud jong u rangbah ba shah thngan ha Khliehriat, u la ong ba kane ka jingshah thngan jong u kadei ka jingshah thngan jong ki paidbah ka East Jaiñtia bad ka Jylla hi kiba trei ha ka kam dewïong, namar la 12 snem mynta ym donkam donjam ha kaba la knieh ïa ka jakpoh jong ki paidbah ka East Jaiñtia bad ka Jylla na ka jingkhang ka NGT ïa ka kam tih dewïong.
U la ong ba ki paidbah ka East Jaintia Hills ki la ïashah haduh 12 snem, bad kyntu ba mynta sa katto katne por ban ai ka jingïatreilang bad ka Association kiba trei dewïong na East Jaiñtia Hills. U la ong ba ka Association ka la lum ïa ki jingthoh bad jingpynbit pynbiang ban buh ïa kita ki jingdawa na ka Sorkar.
“Kaba nga nga kwah ban ong ka long ba ha kane ka jingshah thngan jong u Bah Marshal, ngi ruh ngi ïa thngan lang, 12 snem mynta, ym donkam ym don jam, lah knieh ïa ka jakpoh jong ki paidbah ka East Jaintia bad ka Jylla baroh kawei lyngba ka jingkhang tih dewiong da ka NGT. Bun kiba la duh ïa ka jingim jong ki na kane ka jingthngan jong ki namar kim ïoh shuh ïaka kam.
Kawei nga kwah ban ong khamtam ïa ki paralok ba shah thngan, ngi la ïashah palat 12 snem mynta, sa katto katne por ïa ngi to don ka jingiashaniah bad ngin iatreilang ha kajuh ka shatri bad kane ka Association jong ngi. Kane ka Association jong ngi, ka la pyllang ia ki kot ki sla, ki kyndon bad ki jingdawa na ka Sorkar.
Lada ka Sorkar ka shimkhia, ngin ai ka jingïaroh, lada ka Sorkar kam leh eiei ïa kaei kaba ka lah ban leh, ïa kata ngim shah hynrei lada ka Sorkar ka pyrshang, hynrei ngi tip ba ka don ka bynta ka lah ban leh da lade watla ki don ki bynta ba ka Sorkar ka hap shim ïa ki jingmynjur naka Sorkar India,” u la ong.
U Bah Kyrmen uba dei ruh u Myntri barim ka Sorkar, u la ong ba ka Association kan ap shipor ïa ka sorkar, hynrei lada kam leh ïa kaba lah ban leh, kin hap ban leh eiei bad ha kajuh ka por u la pynpaw ka jingshaniah ha u Myntri Rangbah ba un buddien bad ka Sorkar India ba kan pyllait noh na ka jingkhang ïa u dewïong.
Haba kyntu ïa u Bah Marshal ban sangeh noh ka jingshah thngan, u MLA na East Jaiñtia Hills u la ïawer ïa une u rangbah ban ïatreilang ha kajuh ka shatri, da kaba u la ong ba ynnai pynshitom shuh ïalade marwei namar ki paidbah ki la shitom lypa ha ki 12 snem ba la dep.