Nongpoh, Jylliew 4: U Myntri ka Sorkar Pdeng uba khmih ïa ka tnad Health and Family Welfare bad Chemicals & Fertilizers, u Jagat Prakash Nadda, ha ka sngi palei u la plie paidbah ïa ka ARHI Hospital, kawei na ki unit jong ka Far East Wellness Pvt. Ltd, kaba don ha Mawsmai, Jorabat, bad kane ka long ka jingmyntoi bad ka jingkyrkhu ïaki paidbah ka jylla bad ka thaiñ Shatei Lam Mihngi ban dang pynkhlaiñ bad kyntiew ïaki rukom sumar bad kumjuh ruh ka jingshakri haka liang ka koit ka khiah.
Ha kane ka jingïalang plie paidbah la wan ban sakhi da u Myntri ka tnad Health and Family Welfare ka sorkar Meghalaya, u Bah Wailadmiki Shylla kum u symbud kongsan, u Myntri ka tnad Community & Rural Development bad General Administration Department (GAD), u Bah Sosthenes Sohtun, u Rameswar Teli uba dei u Myntri ka Assam ba khmih ïa ka tnad Tea Tribes and Adivasi Welfare, u Bah A. L. Hek, Chairman ka ARHI Hospital, u Bah Mayral Born Syiem MLA ka Nongpoh, u Abhishek Saini Deputy Commissioner ka Ri-Bhoi District, ki bor pynïaid bad ki nongtrei ka ARHI Hospital naduh ki doctor, ki nurse ki ophisar sorkar, ki nongïalam shnong bad kiwei pat ki riew rangbah.
Haba kren ha kane ka jingïalang, u Nadda u la ong ba hapoh ka jingïalam jong u Myntri Rangbahduh ka Ri, u Narendra Modi, ka thaiñ Shatei Lam Mihngi ka la kiew shaphrang ha kiba bun ki liang, khamtam eh ha ka jingshakri ïaka koit ka khiah.U la ong ba kane baroh ka dei ka jingiohi jngai jong ka sorkar ka jingïaid shaphrang ka dei lyngba ka jingai jingïar jingïohi jong ka Sorkar India sha kane ka thaiñ bad lyngba ki polisi bapher bapher.
U Nadda u la ai jingïaroh ïa ka ARHI Hospital namar ka jingwanrah ïa ki jingshakri kiba kham biang bad kiba tbit ha ka liang ka koit ka khiah sha ki paidbah ka thaiñ. U la kdew ruh ïa ki kor bad ki jingdonkam kiba thymmai bad kiba tbit ba la pynbiang ha kane ka hospital, kiba kynthup ïa ka Oncology Unit kaba pura, ki PET-CT Scan Services, ki jaka sumar kyrkieh (Critical Care Facilities), ka Neonatal Intensive Care Unit (NICU), ki Diagnostic kiba paka bad hynriew tylli ki Modular Operation Theatre.
U Myntri ka Sorkar Pdeng u la kren ruh halor ka jingkylla ka rukom treikam ka tnad ka koit ka khiah haka ri lyngba ka National Health Policy 2017, naduh ki sub centre kiba la tip ruh kum ki Health and Wellness Centre haduh ki jaka sumar ba kham heh ha kylleng ka ri kaba la long ka jingmyntoi bad ka jingkyrkhu ïaki paidbah haki jylla bapher bapher ka ri India.
Namarkata lyngba kane ka jingplie ïa kane ka Hospital kaba don ruh ki tiar ki tar kiba paka ban sumar ïaki jait jingpang bapher bapher kan long shisha ka jingmyntoi ba ki paidbah kim donkam shuh ban beh ïaki jaka sumar ba sha jngai ryngkat ka jingkyrmen ba kane ka jaka sumar kan dang lah shuh shuh ban dang pyniar bad pynheh ïaki tnad sumar bapher bapher.
