Mawkyrwat, Jylliew 04: Ki Pulit jong ka Ranikor Police Station mynta ka sngi ki la ïoh tam ïa kawei ka metïap jong uwei u rangbah bym pat lah ban ithuh, kaba la per harud jong ka Wah Kynshi, hajan ka Jingkieng Borbasing ha shnong Rilang, Ranikor, South West Khasi Hills District.
Katkum ka kyrwoh ba la pyllait da u Bah B. Jyrwa, MPS, Superintendent of Police ka South West Khasi Hills District, u la ong ba ha ka por kumba 2:15 baje nohphai sngi, ki Pulit ka Ranikor Police Station ki la ïoh jingtip na ki paidbah ba la don ka metïap jong uwei u shynrang kaba la per ha sla um hajan ka Jingkieng Borbasing.
Hadien ba la ïoh pdiang ïa kane ka jingtip, ki Pulit ki la leit mar-mar sha katei ka jaka bad ha ryngkat ka jingïadon lang u Rangbah Shnong ka Rilang, ki la ïoh ban sei ïa ka met sharud um. Ha ka jingtohkit kaba nyngkong, la lap ba ka dei ka metïap jong uwei u shynrang bym pat lah ban ithuh ne tip kyrteng.
U Superintendent of Police ula ong ba la suba ba une uba khlad noh u lah ban dei u bym dei trai jylla (non-tribal). Ha ka jingkhmih bniah ïa ka met, la lap ba u la don jingmynsaw ha ka bynta jong ka khlieh kaba la pait (fractured skull), hynrei ym shym la lap kino-kino kiwei pat ki dak jingmynsaw kiba paw ha kiwei de ki bynta jong ka met.
Ïa ka metïap la pynkit noh sha ka morgue jong ka Ranikor Community Health Centre (CHC) ban pynlong ïa ki jingdonkam katkum ka aiñ.
Halor kane ka jingjia, ki Pulit ka Ranikor Police Station kin register ïa ka Unnatural Death Case bad kin bteng ïa ka jingtohkit kaba bniah ban lap ïa ka jingithuh jong une uba khlad noh bad ruh ïa ki daw tynrai jong kane ka jingjia.
