Kem ki pulit pahara khlaw ka Assam ïa u Rangbah na Ri-Bhoi ba kynnoh pynïap dusmon ïa u hati khlaw ha Topatoli

Nongpoh, Jylliew 04: Uwei u rangbah naka shnong Umlakhar jong ka thaiñ Umden, Ri-Bhoi District, u la shah kem noh haki pulit pahara khlaw ka Sonapur Forest Range, Assam hadien ba u la shah kynnoh donkti ban pyniap dusmon ïa uwei u hati khlaw haki thaiñ Dikchak hills jong ka Topatoli ha u bnai bala dep.
Katkum ka jingtip bala ioh lum la ong ba utei u rangbah u dei uba la tip kyrteng kum u Bah Salvation Nongrum 43 snem ka rta naka shnong Umlakhar, Ri-Bhoi District u la shah kem haka step phyrngap jong ka 3 tarik Jylliew 2026.
Ki bahaiing jong utei u rangbah kila ïathuh ba kim shym poi pyrkhat ïaka jingshah kem jong utei u rangbah bad kila kynnoh ruh ba ka dei tang ka jingshah pharep bad shah kynnoh kulmar namar utei u rangbah u dei ruh uba ju kamai kali, bad ki pulit pahara khlaw kila bom bad shoh ruh haka por ba ki kem ïa u.
Utei u rangbah mynta u dang don ha kti ki pulit ka Assam bad shah pynngat ruh haki kyndon aiñ jong ka Wildlife (Protection) Act, 1972 kiba dang pynlong ka jingtohkit halor katei ka jingjia.