Nongstoiñ, Jylliew 04: Ka Hynñiewtrep Youths Council West Khasi Hills District ha ka sngi palei ka la leit ban ïakynduh markhmat bad ka Deputy Commissioner West Khasi Hills District ka Hema Nayak IAS, halor ka jingsngew pyrshah ïa ka jingpynbor ban teh ïa ki Smart Meter lyngba ka Office MePDCL.
Ka seng hapoh ka jingïalam jong u bah Lumlang Kharsyiemlieh President bad bah Wanteibok Lyngdoh General Secretary, ka la pynpaw ba ka la ïoh ïa ka jingujor na ki paidbah bad ki nongïalam shnong ïa ka jingthmu jong ka sorkar ban sdang noh ïa ka jingpyndait smart meter.
“Ka seng ha ka jingwad jingtip bha, ka la lap ba lada ki paitbah ki shah ban pyndait Smart Meter ka bill ka kiew namar ka dei ka system thymmai, ka system thymmai kan thut ïa ka kam thang lait bad wat ïa ki nongtrei bym lah ban trei ba la noh ka karta lah ban shah weng noh ruh mano ban tip”, ong u Bah Lumlang Kharsyiemlieh president ka seng.
“Ha ka prokram pynshai paidbah la pynïaid da ki BDO, te shaei ki Engineering ka MePDCL. Ïoh ma ki ruh kim mon ïa kane ka system thymmai ka ban ñion ïa ki paitbah. Nalor nangta ïa ka prokram pynshai paidbah la khot tang ïa ki nongïalam shnong.Ka kam thang lait kam dei tang jong ki nongïalam shnong, ka dei ka kam bad ki paidbah, kumta dei ban leit sha ki paidbah ba kin rai la kin pdiang ne em”, u la ong.
Shuh shuh u la ong, “Ngi buh jingkylli ruh balei ban sdang na Nongstoiñ ne na West Khasi Hills, balei phim sdang na Shillong ne Tura bad lane ha Mairang kaba dei ka jaka u Power Minister phi mut pynbiej ïa ngi ki paidbah ka West Khasi Hills, ngim ailad kum ka Seng”.
“Ka jingpynkylla ïa ka system ka dei ka business share ki Minister, ki heh sorkar ban bam tyngka bad wan tuh na ki paidbah ba duk.Haba ka system barim ka don balei phim pynneh ne pynbha.Mynta phi pynkylla hato kam dei ka business khñiot ïa u ba duk, ka HYC ka pyrshah jur ïa kane”, u la ong biang.
“Na ka liang ka DC ka la ong kan da bthah ïa ka MePDCL ban leit ïakynduh ne pynshai sha ki paidbah bad kan sa leit dalade ban leit jngoh ïa ki paitbah ki pdiang ne em. Ka DC ka ong kan da phah ïa kane ka jingpyrshah ka seng sha ka sorkar”, ong u bah Wanteibok Lyngdoh Secretary ka seng.
“Na ka liang ka seng ka kren shai lada wan ka system thymmai, kan kiew ka Bill lait 80-100 % kumba ngi ju lap man la ka por. Lada ka kiew ka sorkar ka pynbor ban pyndait ïa ka ki smart meter bad lada ka Bill lait ka kiew, ka HYC kan lum ïa ki paitbah ban tur sha Office ka MePDCL”, u la ong.
“Ngi dawa ïa ka sorkar wat pynbor ban phah pyndait jubor ïa ki smat meter hapoh ka West Khasi Hills District.Ngi kyrpad ruh ïa ki MLA ba ki dei ban ïasaid halor kane na ka bynta ki paidbah”, ong u Bah Wanteibok Lyngdoh.
