Tura, Rymphang 18: Ka Garoland State Movement Committee (GSMC) ha ka sngi Thohdieng ka la leit ban aiti ïa ka dorkhas sha u Myntri Kam Poh Ïing ka sorkar pdeng u Amit Shah halor ka jingdawa ban ïoh la ka jylla Garoland ban ïakhlad noh na ka jylla kaba mynta.
Kane ka jingleit ai dorskhas ka dei ha ka jingwan iuhkjat u ba nyngkong eh u Amit Shah ha Dobasipara BSF Camp, Tura.
Na ka liang ki nongïalam ka GSMC ka la pynsgew ha u Shah ba kane ka jingdawa Garoland ba laitluid jong ki paidbah Garo ka la dei ka mat kaba la slem bha namar dei naduh u snem 1899 ha kaba u khla wait ki Garo u Matgrik Lt. Sonaram R. Sangma u la ïakhun pyrshah ïa ki Phareng na bynta ban ïoh ïa ka Garoland laitluid.
Shuh shuh ki la kdew ba u nongïalam ka Garo National Council u Clifford R. Marak u la rah ruh ïa kane ka mat ha poh Assembly ban ïatai naduh u snem 1992 haduh ba un da khlad ha u 2014.
“Ka jingdawa Garoland ka la dei ka jingangnud kaba la slem ha kaba wat ki kynhun lehnoh kum ka A.chik National Volunteer Council (ANVC) bad kiwei de ki seng lehnoh naduh u 1995 haduh 2005. Naduh ba la sdang ïa ka GSMC haduh mynta ka jingdawa Garoland ka nangkhlaiñ vad kan ïai dawa ruh haduh ban da ïoh ïa ka jingdawa. Ki paid Garo ki don la ka ktien ka thylliej, bad ki rukom im kiba dei ban ïoh jylla kumba ki Gujarati ba kren ïa ka ktien Gujarat ki ïoh la ka jylla na Maharastra bad kumjuh gi ruh ngi dei hok ban ïoh,” pynpaw ka GSMC ha ka dorkhas.
Na ka liang u Myntri Rangbah ka Assam u Himanta uba don lang ha kane ka jingïakynduh u la ong ba un sa ïashong pyrkhat sani bah bad ki nongïalam ka GSMC halor kane ka jingdawa ba shongnia jong ki.
