Bun kiba pass MA ba kloi ban trei kum ki peon: Dr. Aman War

Tang ka New Shillong ban weng dheng kali

0

Shillong, Rymphang 18 : U kyrtong ka UDP na Shillong North constituency, Dr. Aman War haba kren ha ka jingïalang pynshai paidbah ne ka Common Platform ba la pynlong da ka Dorbar Shnong Wahingdoh u la ong ka mat kaba ktah eh ïa ki samla mynta kadei ka jingkyrduh kam kyrduh jam ha kaba ki samla ba la pass ïa ka Master Degree ne MA ki kloi wat ban trei wat ïa ka kam peon ruh.
Haba bynrap shuh shuh halor katei ka phang u la ong ba ka daw tynrai hi kadei namar ka don ka jingbakla ba ym shym la ai ka jinghikai lane ka jingnang jingstad ïa ki samla lyngba ki vocational training ba kin lah ban ieng ha la ki jong ki kjat. “Ka jingbym ïoh kam ka wanrah ïa ka jingdon ki samla shilliang kiba la nang la stad bad shilliang pat kiba ym pat da biang kumta kane ka pynmih ar shah ki jingeh bad ki jingshitom,” u la ong.
U ong ruh ba halor ka ïohkam ïohjam kin pyntikna ba naduh ki kam ba lait ha ki tnad ka sorkar pdeng ne ha ki kompeni ba don hangne ki dei ban ai kam beit 100 persen ïa ki nongshongshnong.
Nalorkata, u ong ruh ba na shilliang pat la mih sa u drok uba bun ki longiing ki la dep ban mad ïa ka jinglanot. “Ki longiing ki latrei, ki Dorbar Shnong, ki samla shnong ki la trei hynrei ka jingeh jongngi kadei balei ngim lah ban pynsangeh ïa ka jingpynpoi ïa kitei ki drok sha ki khynnah jongngi. Lada ngi lah ban pynduh suplai lah ban pynjem ïa kiba kyrni namar ka kham suk ban sumar ia kiba kyrni dih drok ha hospital ban ia kiba kyrni dihkyiad namar ki kham koit kloi. Hynrei ki ngat shi ngat biang pat namar ba don ka suplai,” bynrap biang u Dr. Aman.
Katkum ka jingong jong u, kitei kiba die ki tan bad ki khring biang ïa ki mar ïa mih na ki jaka sumar. “Kumta lada ngi poi ha ka bor ngin pynduh ïa kiba suplai ia u drok,”u la ong.
Ha kawei pat ka liang u la ai ka jingïaroh ïa ka KSU kaba la kyrshan ïa ki samla ban leit ïakhun ïa ki eksam ba heh kum ka IAS. “Na ka sorkar lada poi ha ka bor ngin kyrshan 10 ngut shaneng ïa ki samla khnang ban ïoh kham bun ki ophisar lajong,” u la ong.
Kawei pat ka mat kaba u Dr. Aman u kren kadei halor ki kot pule ha ki skul. Katkum ka jingong jong u mynta ia ki kot pule ha ki skul la shu pynkylla man ka por ha kaba ki khynnah kimlah shuh ban pyndonkam biang da ki kot ba pyndonkam ki hynmen ha ki snem ba la dep.
Shuh shuh u la pynshai ruh halor ka jingsiew ïa ka bai luksan kaba 50hajar na ka bynta kiba iap na u COVID kaba dei na ka sorkar jylla katba ka 4 lak pat kaba wan na ka sorkar pdeng kadei kaba hap ban ïaid bun kyndon ym dei ba ka jah klop.
Kawei pat ka bynta kaba utei u kyrtong u kdew ka long halor ka dheng kali, halor kane u ong ban ïakhun ne ban pynduh ïa kane kadei beit sa tang ban pynmih kham bun ki New Shillong.

Leave A Reply

Your email address will not be published.