Ka jingong u Amit Shah ba ka Meghalaya ka dei kaba bamsap tam ka dei ka jingkren election: Conrad

0

Shillong, Rymphang 18: U Myntri Rangbah ka Jylla, u Conrad K Sangma u la ong ba ka jingkren jong u Amit Shah kadei tang ka jingkren ïalap election namar kadei ka jingkren kaba ka BJP ka la kren ha man la ki election ha kiwei ki Jylla ruh.
Lah ban kdew ba u nongïalam ka BJP uba dei ruh u Myntri ka tnat Kam Pohing, u Amit Shah ha ka sngi Palei ha ka jingïalang paidbah ha Tura u la kynthah tyngeh ïa ka National People’s Party (NPP) ba la ïalam da u Conrad Sangma, bad u la ong ruh ba ka Jylla Meghalaya kadei kaba nyngkong eh ha ka kam bamsap na ki Jylla hapoh ka ri India.
“Kum kine ki jingkren da ki nongïalam ka BJP ngi ju ïohsngew ha man la ki jingïalap election ha kiwei ki Jylla ruh, kum ha West Bengal, Telengana, Delhi ne ha kino kino ki Jylla ba ka BJP ka don ha ka Liang Pyrshah,” la ong u Conrad uba dei ruh u national president ka NPP.
U Myntri Rangbah u la ong ba ka BJP ha Meghalaya ka don lang baroh san snem ha ka Sorkar bad ïatreilang bad ka NPP, bad kum kine ki jingkynthoh kidei tang ha ka por election.
“Ngam don eiei ban kren halor kane ka jingkynthoh jong ka BJP, namar ki la treilang ruh bad ngi,” u la ong shuh shuh.
Ha kaba ïadei bad ka jingbyrngem jong ka BJP ban phah tohkit ïa ki kam bamsap ha Meghalaya da u Rtd. Judge jong ka Supreme Court, u khliehduh ka NPP u la ong ba um sngeweiei namar kadei ka kular ba ki buh ha kane ka election ban leh.
Haba kylli bad ka jinglong jingman ka NPP ha ka jingïabeh sha ka thong, u la ong ba ka NPP kan poi beit sha ka jingjop ban ïoh synshar marwei.
Halor ka jingkulmar bad ïashoh na ka daw jong ka election ha Garo Hills, u Conrad u la ong, ban kynnoh ba ïa ki jingkulmar la pynmih da ka NPP ka long kaba bakla, namar kum ka party ka ngeit ïa ka election kaba jai jai bad kaba suk kaba sain, bad lehse ki jingjia kidei na kiwei kidaw kiba la don lypa ha kito ki jaka.

Leave A Reply

Your email address will not be published.