Ha kajuh ka sngi 4 tylli ki mawnongrim plie bad buh mawnongrim u Myntri PHE ha lai tylli ki shnong

0

Mawkyrwat, K’lyngkot, 11: U Myntri ka tnad umbam umdih jong ka Sorkar Meghalaya, u bah Renikton Lyngdoh Tongkhar uba dei ruh u nongmihkhmat jong ka Mawkyrwat Constituency ula ïoh ban plie bad buh ïa ki mawnongrim na ka bynta ban pynbit pynbiang ïa ka umbam umdih hapoh ki lai tylli ki shnong kata ha shnong Nonglang, Rangmaw bad Mawsaw ki shnong kiba hap hapoh jong ka South West Khasi Hills District.
Lah ban kdew Hangne ba ha shnong Nonglang ka dei ka skhim jong ka Nonglang Water Supply Schemes kaba na ka Jal Jeevan Mission (JJM) ha ka jingmang kaba 8 (phra) klur tyngka bad ïa kane la dep ban pyntrei, ha shnong Rangmaw ka dei ïa ki ar tylli ki bynta ka Rangmaw Water Supply Schemes kawei ka dei na ka skhim RIDF ha ka jingmang pisa kaba 5 klur tyngka ha kaba ïa kane la dep ban pyntrei bad sam um ha manla ki jaka bad na ka JJM ha ka jingmang kaba 1 klur tyngka ka ban dang pyntrei ban pynpoi um ha manla ki thliew ïing bad ha ka Mawsaw Water Supply Schemes pat ka dei na ka bynta ki 14 tylli ki shnong ha ka jingmang kaba 18 klur tyngka ïa kaba yn sa pyntrei noh shen.
U bah Renikton Lyngdoh Tongkhar, haba kren ha kine ki jingïalang ba la pynlong mynta ka sngi ula pynshai ha ki paidbah ba kine baroh ki dei ki lad pynroi na ka bynta ki paidbah jong ki shnong ki thaw kiba na ka liang ka sorkar India ka la dep ban mang kyrpang ha manla ki jylla. “Hapoh jong ka Jylla Meghalaya baroh ka la poi kumba T. 7 hajar klur tam ei e bad ka thong ka long ban pynpoi um ha baroh ki shnong bad man la ki thiew ïing hapoh jong ka jylla Meghalaya”, la pynsngew u bah Renikton. Shuh shuh u la ong ruh ba na ka liang ka sorkar India ka la buh ruh ïa ka thong ban pyndep noh ïa ki bynta ha ka ban pyntrei ïa kane ka jingpynpoi um ha u snem 2024.
Namarkata, u la kyntu ïa ki nongpyntrei ne ki contractor ba kin pynkloi ïa ki kam ne jingpyntrei jong ki ïoh ba ka sorkar India kan rah noh ïa kane ka skhim Jal Jeevan Mission (JJM) ha u snem 2024 bad kan sa buh jingeh ïa ki nongpyntrei bad ïa ka Jylla Meghalaya.
Ula kyntu namarkata, ïa ki paidbah bad ki shnong ba kin long kiba kylluid khlem ka jingkhim mynsiem na ka bynta ka jingpyntrei ïa kine ki lad pynroi ha ka ban pynpoi ïa ka umbam umdih narmar ba ki sngewthuh ba ka um ka dei kaba donkam tam ha ka jingim jong ki briew da kaba ngeit skhem ba kumba ka long ha ki snem ba la dep bun na ki ïing ki sem ki pyndonkam ban leit tong um na ki pung um da kaba ki hap ban ïaid ïa ka lynti kaba jngai bad kaba kham pajih na ïing hynrei ynda la lah ban pynpoi um ha man la ki thliew ïing kan sa long ka jingkyrkhu ka ban kham pynsuk ïa ki paidbah nongshong shnong.
Ha kane la sngi la ïadonlang naduh ki nongïalam jong ki shnong kiba kynthup ïa ki Myntri bad ki Sordar Shnong bad kumjuh ruh ki ophisar jong ka tnad PHE kata u bah S. Najiar, Executive Engineer ka PHE Mawkyrwat Division bad u bah K. Nongbsaw, SDO ka PHE Mawkyrwat Division lem bad ki ‘riew rangbah jong ka dong ka thaiñ.

Leave A Reply

Your email address will not be published.