Na ka jingkhih jong ki samla ha u snem 2022 na ka jingkyrduh kam kyrduh jam bad ka jingmih ki sengbhalang ban dawa na ka sorkar ban thaw kam thaw jam ka long kawei na ki lad kiba ka Sorkar ka kham don lad ka dei satang ka Tourism ne ka kam jngohkai pyrthei.
Ban pynurlong ïa ka angnud jong ki samla kiba kwah ban ieng ha la ki jong ki kjat ka Sorkar ka la mynjur da ka Meghalaya Tourism Policy khnang ban kyntiew ïa ki kam jngohkai pyrthei.
Ka kam jngoh kai pyrthei ka dei kawei na ki kam ba ka Sorkar ka ju ïai pynbna na ka por sha ka por ba kan shimkhia ban pynkylla ïa ka kum ka kam karkhana ban pynïohkam ïohjam ïa ki samla hapoh ka jylla khnang ba kin ym shaniah tang ha ki kam Sorkar hynrei ba kin lah ban ïeng ha la ki jong ki kjat da kane ka kam.
Ha, oid, ym lah ban len ki la don bun shisha kiba ïoh jingmyntoi na kane ka kam hynrei kaei kaba donkam ka long ba ka Sorkar Jylla lyngba ka tnad Jngohkai Pyrthei ka dang donkam shuh shuh ban dang pynbha bad pynjanai ïa kane ka kam bad jaka jngohkai kiba don ha kane ka jylla.
Ka jingpynbha ïa ki jaka jngohkai kam dei eh ban leh tang shisien leh la biang hynrei ban peit bad maramot bad pynbit pynbiang ïa ki kat kum ki jingdonkam bad dawa jong ka por. Ban kyntiew ïa kane ka kam ka donkam ka jingïatrei lang ruh jong kiwei kiwei ki tnad jong ka Sorkar bad ka tnad Jngohkai, kata, kum ka tnad PWD, PHE, Power, Industries and Commerce , Art and Culture bad kiwei kiwei de ki tnad. Balei ba donkam ka jingïatrei lang? Ka daw ka long namar ban leit sha ki jaka jngohkai donkam ban don ki surok bad ki lynti ki syngkieng kiba bha. Ha kito ki jaka ba don ki dam ring um dih kum ha Mawphlang lada pyni tynnad shuh shuh kan long kum kawei na ki jaka jngoh kai ba ithiang tam.
Nalor kata kum ha Umïam, ka Nehru Park, lada don ka jingïatrei lang ka tnad pynmih bording bad ka tnad Jngohkai lah ban shna ïa ki jingpyni tynnad shuh shuh ïa katei ka Park da kaba buh sa ïa ki jingpynthaba bapher bapher ki ban khring ïa ki nongwan jngohkai. Nalor kane kum ka tnad kam karkhana ki don bun ki tnad shna jingshna kiba don hapoh jongka kiba lah ban die sha ki nongwan jngohkai kumjuh ruh ka tnad Arts and Culture ka don ka bynta kaba khraw namar ym tang ban pyni ïa ka kolshor sha kiwei hynrei lah ruh ban leh shibun ki kam ban kyntiew ïa ka tynrai jong ngi.
Ka Sorkar ka dei ban shimkhia bha halor kane namar ka donkam ban don noh da ka kynja Komiti kaba heh ka ban khmih ka jingïatrei lang jong baroh ki tnad Sorkar ban kyntiew ïa ka kam jngoh kai hapoh ka jylla. Ym lah ban len lada la lah da shisha ban kyntiew ïa kane ka kam kan long ka jingmyntoi kaba khraw ïa ka jylla namar ka jingïoh lum khajna ruh kan long da ki klur bad phew klur ha ka shisnem tang na kane ka kam. Nalorkata, lada shim khia hi ka Sorkar ban kyntiew ïa ki briew jong ngi ka pisa kan neh hapoh ka jylla bad kan ym tuid satia shawei namar ym lah ban len kat haduh mynta ka pisa ka dang tuid beit shabar ka jylla.
Lada ai nuksa wat tang ki kali kiba wan kit ïa ki nongwan jngohkai sha kane ka jylla ruh kiba bun ki dei beit na Assam. Nalor kata ki don ki nongwan jngohkai ki bym don ki jaka sah kiba biang kumta ki hap ban leit phai bad sah sha Assam ne sha Guwahati. Kumta tang na kine ruh ka jylla ka dang duh nong bun bah ha ka shisnem shisnem.
Kumta kaba kongsan hi ïa ka sorkar ka long ban shimkhia bha ban bishar bad jurip kumno ban kyntiew da shisha ïa kane k kam kaba dei ka kam ba riewspah tam ha ka jylla namar lada kane ka kam ka kiew ki khun samla kim donkam shuh ban phai sha ki kam sorkar namar ki la ïoh ïa ki kam bapher bapher na kane ka kam jngohkai pyrthei. Lada ka sorkar ka shim khia da shisha ïa kane ka tnad ka la dei ban pynlong kum kawei na ki tnad ba heh hapoh ka sorkar khnang ba ki myntri ne ki ophisar kiba dei peit ïa kane ka tnad ruh kin shim khia bha namar kumba long mynta kam pat da don kata ka jignshim khia kaba haduh katta katta ban kyntiew da shisha ïa kane ka kam jngohkai ha ka jylla.
ñiuma, mynta ha ki ar snem ba la pynwit ka jingpang khlam Covid, ka kam Jngohkai pyrthei ka la hiar hynrei mynta ka la kiew bha na ka jingwan tuid jong ki briew kiba nabar bad ka jingdon jong ki jaka sah pyngngad kiba biang.
