Mawkyrwat, Kyllalyngkot 11 : Ka Federation of Khasi Jaiñtia & Garo People’s (FKJGP) jong ka Mawpud Unit ka la ïoh ban pynhap pyrda noh ïa ka lympung ïalehkai kynjatbol ha kaba ka Erkai Football Club ka la jop da 4 – 2 kol pyrshah ïa ka Mawpud Football Club ha mada shnong jong ka Mawpud, South West Khasi Hills District.
Ha kane ka phainal ka dei hapdeng ka Erkai Football Club bad ka Mawpud Football Club ha ka jingïaleh ha kaba sdang eh baroh ar tylli ki kynhun ki la ïoh ban thep mar ar kol kata ka Erkai FC la ïoh ban thep da u Michael Turnia ar tylli ki kol bad ka Mawpud FC pat la ïoh thep da u Pynshai shi kol bad shwa ban kut jingïalehkai jong ka kyllastep ka Mawpud FC ka la ïoh ban thep biang sa kawei ka kol lyngba u Riful Snaitang.
Haba phai pat ha ka jingïalehkai jong ka kyllamiet ka Erkai FC ka la ïoh ban thep biang ar tylli ki kol kata lyngba u bah Marton Kharlartang lyngba kane ka Erkai FC ka ïoh ban khur jingjop da kaba ïoh ban thep haduh saw tyli ki kol katba ka Mawpud FC ka la ïoh tang artyli ki kol.
Namarkata, haduh kaba kut jong ka jingïalehkai ka Erkai FC ka la tam noh da 4 – 2 kol pyrshah ïa ka Mawpud FC bad rah syndon ïa ka nam jop.
Ha ka jingïalang ba lyngkot, u bah Kanesjune L. Nonglait, President ka FKJGP South West Khasi Hills Dstrict kum u kongsan, u la ong kum ki ‘rangïalehkai kynmaw ba kin kiar ïa ki bam ka dih kiba pynbiaid namar kine jingdih pynbuaid kin wanrah ïa jingpyntroi ïa ka met ka phat bad namar ba bun ki nongïalehkai na nongkyndong ynda la kham kiew ki la sdang ban tare sa ïa ki jingdih ba pynbuaid bad kane ka pynlong ba wat la ki don ka sap ïalehkai ha kano kano ka jait jingïalehkai kim ju poi shuh sha kata ka thong bad ki ju kut noh ha shi teng lynti.
U bah Balse Kharbani, General Secretary ka FKJGP South West Khasi Hills District pat u la ong ba ka kam ïalehkai kynjatbol kam dei shuh tang ka jingïalehkai tamasa hynrei ka dei ruh ka lad kamai ja kpoh. Kumta u la kyntu jur ba ki samla kiba dang don bun ka lawei ba kin kiew ha kane ka jingïalehkai ki dei ban trei shitom ban minot bad kim dei ban kut tang hangne hynrei na kane ka madan kin mih ki ‘rangïalehkai ba ki ïa don mynta ha ki jingïalehkai kiba sha jrong kum ha ki District Level lane ha ki State Level.
Ha kane ka sngi la ïoh ruh ka jingkren ai mynsiem na u Myntri Shnong Mawpud, u bah S. Basanha kaba u la ai mynsiem ïa ka FKJGP ba kan nang ïaid shaphrang bad ban ïa trei lang khamtam na ka bynta ka bha ka miat jong ka dong ka thaiñ.
Hadien katta la ïoh ruh ban sam ïa ki khusnam bad ka song pisa sha baroh ar tylli ki kynhun kata kaba jop ka ïoh T. 15000/- bad ka khusnam katba kaba wan ba ar ka ïoh T. 10000/- ryngkat ka khusnam.
