Ujor ka HNYM ba bun satang ki dalal ha ophis DTO

0

Nongstoiñ, K’lyngkot, 11: Ka seng Hynñiewtrep National Youth Movement hapoh ka jingïalam jong u bah Kmendar Tympuiñ president HNYM Nongstoiñ, mynta ka sngi ka la leit ban tuklar ïa ka rukom aplai laisen bad ka jingïaleh kot kali jong ki paidbah ha ka ophis jong u DTO Nongstoin.
La ong ba katei ka jingleit jong ka seng ka dei halor ka nongrim ba ki paidbah ki la ud la nam ha ka seng, da kaba ujor ruh ba katei ka ophis tnad treikam jong ka sorkar, ka long kaba kynrum kynram bha namar ka jingdon bun palat ki dalal, kiba pynïaleh ïa ki kot kali khlem da ioh ban ïadei bad ki ophisar.
Haba ïadei bad katei ka phang na ka liang jong ka seng ka la ioh ban ïakynduh ïa u bah I. Kharmon District Transport Officer. Ha ka jingïakren ka la ai ruh da ka jingthoh bad ka la buh por tang ar taiew ba katei ka tnad ka dei ban leh ïa kaba donkam na ka bynta u paidbah jong ka District.
U nongthoh khubor haba u pyrshang ban kylli pyrthew na ki katto katne ngut ki ki nongñiah kali kamai ha sor Nongstoiñ, ki la ong ba baroh baroh ki ïa ud haba ki leit donkam ha katei ka ophis. Namar ïa ki kam kaba dei ban lut tang 5 hajar tyngka ruh la hap ban pynlut da ki phew hajar, namar ka jingbun than jong ki dalal kiba kam trai ïa katei ka ophis nalor ba slem ha ka rukom treikam.
Na ka liang jong u Ophisar ha ka jingïakren bad u nongthoh khubor, u la ong ba shen na ka liang jong u, un buh noh ïa ka notice ha phyllaw ka ophis ban pyni ïa ka jinglut ne ki dor ki mur kaba dei ban lut haba aplai laisen ne ïaleh kot kali, khnang ba ki paidbah kin tip ïa ka bai lut.

Leave A Reply

Your email address will not be published.