Mawkyrwat, Lber 10: Ka Nativity Higher Secondary School, Mawkyrwat kan sa ïoh ban rakhe ïa u mawmer jong ka jingdap 50 snem jong ka jingshakri ïa ka dong ka thaiñ lyngba ka jingnang jingstad. Kumta kan sa plie ïa kane ka jingrakhe jubili ksiar ha ka 3 tarik u Ïaïong, 2024 ha ka por 10 baje mynstep.
Namarkata, na ka liang jong ka School Managing Committee ha ryngkat ki nonghikai ka khot sngewbha ïa baroh ki khynnah skul ba rim bad ruh ïa ki kmie ki kpa jong ki khynnah skul ba kin wan pynshit pynshngaiñ lem ïa kane ka jingplie pyrda.
Ym tang kata ha kajuh hi kan sngi kan don ruh ka jingplie ïa ka Annual School Sports 2024 ha madan jong ka Nativity Higher Secondary School, Mawkyrwat, South West Khasi Hills District. Kane ka long katkum ka kyrwoh na u Rev. Fr. A. Wahlang, Principal jong ka Nativity Higher Secondary School, Mawkyrwat lem bad ka Past Pupils.
