Jur ka jingpynïap pathar ïa ki doh um doh wah ha ka thaiñ Lyngngam wat la bun ki jingmana

Nongstoiñ, Lber 10 : Wat la ki dorbar shnong, sengbhalang, ki synjuk jong ki rawon, ki seng pynneh pynsah ïa ki doh um doh wah, ka seng kur Rongrin bad kiwei kiwei kiba don ha baroh ka thaiñ Lyngngam, ki la maham bad pyrkhing haduh katta katta ban pynïap pathar ïa ki doh um doh wah da kaba ber da ki dawai bih, siat bom, khang jar. Hynrei, ki riew shim kabu ki dang don bad ki dang ïaleh pyrshah man ka por, ong u bah Boylan Langrin Myntri ka hima Nonglang Sirdarship.
Utei u rangbah haba ïakren bad u nongthoh khubor, u la ong ba ki wah ba kongsan kiba don ha ka thaiñ Lyngngam ba ki rawon bad ki paitbah nongshong shnong ki im sngi ban leit khwai bad leit tong doh, ki dei ka wah blei, Riat tham, wah Riangdo, wah Biu, wah Riangken, wah Riangsih bad bun kiwei kiwei ki wah.
Ha kitei ki wah, ki dorbar shnong, sengbhalang bad seng ïada doh um ki la buh da ki signboard ha man la ki jaka bad thoh ïa ki jingmaham, hynrei ki riew shim kabu kim patiaw bad kim kheiñ snep satia. U la ong ruh ba kitei ki riew shim kabu haba ki leit sha ki wah, ki ju rah da ki jar khang bad ki rah ruh da ki kynja dawai tutia ban ber ha wah, khnang ba ki dohkha kin buaid bad ngat ha ki jar bad ki ju rah ruh da ki gelatin ban bom.
U la ong ruh ba na ka liang jong ki riew rangbah, ki sengbhalang, ki dorbar shnong bad ki nongsynshar hima jong ka hima Nonglang Sirdarship, ki sngewkhia jur namar dang ha kine ki taïew ba la dep, ki la ïoh jingtip ba ki nongshong shnong ba don ki briew kiba leit pynap jar ha Wahblei, ha kaba ki la lap satang ïa ki dak ki shin ha kaba ki la suba jur ba kitei ki riew shim kabu ki lah ban pyndonkam ruh da ki kynja dawai ban pynïap pathar ïa ki doh um, hynrei kim shym lap shuh ïa ki briew kiba leh ïa katei ka kam.
Ha kaba ïadei bad katei ka kam ki riew rangbah bad sengbhalang ki dang buddien ban lap ïa ki bad lada lap ïa kiba don kti kin leh da kaba tyngeh. U la kyntu ruh ïa ki para nongshong shnong ka thaiñ, ba ki dei ban kiar rai maw rai dieng na ka jingpynïap pathar ïa ki doh um doh wah.
Lada ki lap ïa kino kino kiba pynïap pathar ïa ki doh um don wah kin pyntip kloi katba lah ha ki sordar, rangbah shnong bad ki sengbhalang khnang ba kin leh ïa kaba donkam.
U la ong ruh ba kim dei ban sheptieng namar wat ki bor ka aiñ ruh ki la khang pyrshah ban pynïap dusmon ïa ki doh um doh wah ki mrad ki mreng, ki sim ki doh bad baroh ki jingthaw ba im ha um bad ha ryngkew.