Nongpoh, Lber 10: Kum ka jingburom ïa ki Longkmie halor ka sngi kyrpang jongki ba la tip kum ka International Women’s Day ba la rakhe ha kylleng ki ri ka pyrthei, ka University of Science and Technology (USTM), Baridua Killing ha ka 8 tarik u Lber ka la pynlong da ka jingrakhe ba kyrpang lyngba ki prokram bapher bapher ban ai burom kyrpang ïa ki Longkmie ha katei ka sngi kyrpang jong ki Longkmie.
Ka USTM ka la pynlong ruh ïa kane ka jingrakhe da ka jingrekhe ba kyrpang ba la shim bynta da ki department bapher bapher katei ka skul bah. Ka Centre for Gender Studies ka USTM ha kane ka sngi ka la leh kyrpang ruh ban pyni da ki kynja documentary sha ki samla pule ban ai jinghikai halor ka jingdonkam ban sgnewthuh ba dei ban long kumjuh ha ka longbriew ka man briew la ki dei ki kynthei ne ki shynrang khlem da don ka jingïapher ha ka long kynthei ka long shynrang.
U Vice chancellor ka USTM, u Prof. GD Sharma u la ai jingkren halor kane ka phang “Gender Inequality and the need for gender centric investment’ ba la dei ruh ban phai khmat kyrpang ïa ki riew kynthei ha ki kam sports hapoh ka ri India.
Na ka ka liang ka Economics ryngkat ka Department ka tnad Commerce ka la pynlong ïa ka prokram ai jinghikai halor ka phang ‘Economic Empowerment for Women’ ha ka jylla Meghalaya lyngba ki SHG. Kane ka jingthmu ka long ban saindur na ka bynta ban kyntiew ïa ka ioh ka kot ki longkmie. Ha kane ka prokram ai jinghikai la don bynta lang ruh naduh ka Kong Felicita L. Majaw ka dkhot ka MSCW, Dr. Bandana Chowdry Assistant Professor ka Economic department na Guwahati University ki la shim bynta ha kane ka ka prokram ai jighikai (workshop).
Ki nongwan shim bynta kiba hakhmat ha kane ka jingrakhe ïa kane ka sngi kyrpang ki Longkmie, ki la ai ki jingkren ban ai mynsiem bad pynshlur da ki jingïathuh khana ba ngi dei ban jop ïa ki jingeh ha ka jingim kaba ngi ïa kynduh man ka sngi.
Ka Kong Felicita L Majaw haba kren ha kane ka sngi ka la ai da shibun ki jingmut jingpyrkhat kiba ju jia man ka por pyrshah ïa ki longkmie bad ki riew kynthei kum ka jingshah lehbein ki Longkmie ne ki riew kynthei kaba la ju jia man ka por ha ka imlang ka sahlang ba ngi la donkam ban pynduhjaid noh bad kum ki Longkmie ki dei ban don ïa ka hok ban imsuk imsaiñ ha ka imlang ka sahlang.
Ka Dr. Bandana Chowdry ka la kren halor shibun ki bynta kiba ïa dei bad ka jingpynkupbor kyrpang ïa ki Longkmie bad ka la kdew ruh halor ki bynta ba ngi dei ban pynkup bor ïa ki riew kynthei kum ka jingailad ban kin paw ha ka kam shakri ha ka imlang ka sahlang, ban kyntiew ïa ka pule puthi jongki, ka ioh ka kot, ha ka kam sain hima sima bad kumjuh ruh wat ha ka pyrkhat ka pyrdain ki Longkmie ba ki dei ban long kiba khlaiñ bor ha ka imlang ka sahlang.
Ha kawei ka bynta, ka Department ka tnad pharmaceutical science ka la pynlong da ka webinar ban ïa kren halor ka koit ka khiah ki Longkmie bad kum ki longkmie ki dei ban long kiba koit ba khiah. Lyngba jong kane ka sngi ki department bapher bapher ka USTM ki la rakhe kyrpang ïa kane ka sngi kyrpang ki Longkmie ban ai burom ïa ki longkmie ha ka jylla bad ka ri hi baroh kawei.
