Sngewkmen u State President ka BJP ba kiew ka party ha East Jaiñtia Hills

Khliehriat Lber 10: U State President jong ka party BJP, u Rickman Momin, hynnin ka sngi u la plie ïa ka ophis jong ka party BJP East Jaiñtia Hills District ha shnong Dkhiah, ha ka jingïalang la kren shibun kiei kiei kiba iadei bad ka party bad ruh ban kyntiew ïa ka party, kum ka jingkyrshan lem ïa kane ka ophis treikam jong ka party, ka Dr Fenela. L.Nonglait lem bad u bah A.L.hek ki la noh syniang da ka pisa bad ong ruh ba ka sharak kam ju rhem khlem ka umphniang, te donkam ban ai mynsiem lang.
Ha katei ka jingialang u State President BJP, u la pynskhem bad pynkup burom ruh ïa ki lai phew san ngut ki dkhot kiba wan ban pyniasoh bad ka party BJP ha East Jaiñtia Hills District.
Haba kren ha ka jingialang , u R.Momin u la pynpaw ka jingsngew kmen ba ka party ka la kiew ha East Jaiñtia Hills District, u la ong ba ha ka por ba u dang wan nyngkong ki don tang hynñiew ngut ki briew kiba wan jingïalang, ha ka sien kaba ar ki don khatsan ngut bad mynta ka kynti ki la don shibun bha ki briew kiba la wan sha ka jingialang bad ruh ki la don shiun kata haduh 35 ngut kiba la wan ban pyniasoh bad ka party BJP, u la ong ruh ba ka BJP kan sa sei da u ne ka kyrtong ba bit ha kane ka election MP ka ban sa long, u kyntu ïa baroh ki nongkitkam bad ki dkhot ban trei shitom ban kyntiew shuh shuh ïa ka party ban poi sha ka thong.
U la ong ba ki don haduh palat 3 lak ngut ki ba la ioh jingmyntoi na ki skim u Modi bad lada kine baroh ki thep vote sha ka BJP khlem pep ka BJP kan jop da kaba suk, u kyntu ïa ki nongïalam bad ki dkhot ba kin leit ban iakynduh bad kito kiba la ioh jingmyntoi na ki skim Modi bad kren bad pynsgewthuh ïa ki a ka party ka dei ka party kaba kyntiew ïa ki paidbah, u la kyrpad ïa ki Disrict President ban pyndep ïa ki kam khnang ba lada ynda la jied ïa u ne ka kyrtong kan suk ban treikam, u la iathuh ruh ba ki la don san ngut kiba pan ïa ki tiket na ka BJP na ka bynta kane ka MP elction bad mynta ka la dei ka por ban ïa treilang ban pynkhlaiñ ïa ka party namar lada ka party ka khlaiñ kam long kaba eh ban ïakhun ïa kano kano ka electon.
Ka Dr Fenella. L.Nonglait, kaba dei kawei na ki dkhot jong ka party BJP ka la kynthoh jur halor ka jingmih bun ki jingkynthoh pyrshah ïa ka party kiba ju mih ha ka por election bad ong ruh ba kine ki long kum kito ki bseiñ plastic bad ynda la dep ka election yn sa ithuh ba ki dei tang ki bseiñ plastic, ka la ong ruh “Ngi tip bha mynta mano ba synshar ha Delhi te kan kham suk ka lynti ban iaid da kata, ka aiñ ka mih na ki paidbah ka riti synshar ri ruh ka sdang da kaba ong ‘ma ngi ki paidbah’ ngi lei ngi la don lypa ka (IOA), Instrument of Assession kaba la pynithuh ïa kita ki 30 tylli ki hima jong ngi bad kita ki 12 doloi, ngi khlem die duh ïa ki hok longtrai jong ngi, ïa ka khyndew ka shyiap, ki synshar ki khadar ngi dang bat”
“Ngi hap ban khanglad ïa u nongtuh ba na poh, katne ngi hiar katne ngi shah thom bor, to ngin ïa iaid ïa kane ka electoon khlem jingtieng, kane ka election kan long kaba phyla bha bad kan wanrah jingkylla ha ka jingmut jingpyrkhat jong ki paidbah” ong ka Dr Fenella.
Kum ka jingpynshai sha ki paidbah, ka kong Fenella, ka la bynrap shuh shuh ba “ngi hapoh ka jylla ngi don 74 percent ki kristan, ha Nagaland ki don 89 percent, ki kham bun ha nagaland katba ha Nagaland synshar ka party BJP, ha ri india baroh kawei ki kristan ki don tang 5 percent te shwa ban wan u modi, kata ha u snem 2014 ki kristan ha India ki don 3.9 percent, hynrei mynta ki don 5.79 percent hato ong maphi, u Modi u pyniap kristan?
Ngi iohi ba ka don jingkiew ki kristan, ka mang tyngka lane ka Interim budget jong ka Assam ka dei T 50 hajar klur tyngka, hynrei jong ka Meghalaya pat ka dei tang T90 klur tyngka, kaba tang ka bai tulop ïa ki nongtrei sorkar ruh ym dap, na kata ka daw yn sa pynleh ne pynlong sa da ki tamasa ban ioh pisa (revenue), ka tamasa ka kylla long pynban ka jingkordit ïa ki paidbah namar la shu khlong na ki paidbah hi. Mynta ka jylla Meghalaya ka don T2000 tam klur ka ram ba la shim na shabar lada phi ong ban pynkhyllem ïa kane ka sorkar, mynta kita kiba sngew ba ki lah ban pynkhyllem ki donkam ban don T2000 hajar klur tyngka ha pla ban siew ïa kata ka ram, hynrei mynta shi tyngka ruh ngi dang ap na Delhi ,ngi donkam mynta ban pyrkhat ïa ka jingkiew ka jylla jong ngi namar ki jingeh kin wan hapoh ka jylla ” ka la bynrap ruh ba ha kane ka elaction ka jingpynkupbor ïa ki kynthei ka la sdang na ka party BJP namar ka la urlong da kaba 33 percent kin ioh ban ïa shim bynta ha ka synshar khaddar, ka la ai ruh ka jingkitbok kitrwiang ïa ki nongïalam bad ki dkhot jong ka party.
U State Secretary BJP, u bah Wankitbok Pohshna, u la kren shaphang ka jingkiew iarat ka ri India hapoh ka jingïalam u myntri rangbah ka ri, u N.Modi bad ong ruh ba ka ri kan sa poi sha ka thong ha kaba iadei bad ka jingkiew ha ka ioh ka kot jong ki paidbah namar ki la don mynta haduh 25 klur ngut ki paidbah ki la lait na ka jingduk tasam hapoh ka jingialam u N.Modi bad ong ba kane baroh ka dei namar ka jingiohi jngai u myntri rangbah ka ri “ki jingkynnoh pyrshah ïa u Modi baroh ki dei tang ki khana election tang ban pynbiej ïa ki paidbah namar ba ki tip ba kim nym lah ban trei kumba trei ka BJP kaba don ruh ki kyntien phira ‘ngyngkong eh ka Ri ba ar ka Party bad khatduh eh ka malade, katba kiwei ki party pat ki pyrkat shwa ialade, ïa kiba haïing ha sem bad u paidbah lei te um don jaka, ngi la iohi ki sorkar ba la leit ha ka por ba shynshar congress ka ri India ka dei kaba duk na kiba duk tam ka wan ha ka kyrdan ba 11 ha ka jingduk, hynrei mynta pat ka la rung ha ka kyrdan kaba san kum ka ri kaba la kiew shakhmat, u Modi u ong ba lada wan biang ha ka bor ka ri India kan rung ha ka kyrdan kaba lai ha ka jingkiew.
U State President ba rim jong ka BJP, u bah Shibun Lyngdoh, u la pynpaw ka jingsngew kmen namar ka jingbun ki briew kiba la wan ban pyniasoh bad ka party BJP ha kane ka sngi, u la kyntu ïa ki nongialam bad ki dkhot ban khot shuh shuh ïa kiwei kiwei ruh bad ong ruh ba ka party BJP kam dei ka party kaba sam pisa hynrei ka party kaba khot da ki kam ki jam ym da kaba shu sam pisa.
Kiba la ai jingkren ki kynthup ruh, u BJYM President, u samla Mewaker Lyngdoh, ka kong Sumitra Laloo, u District President ba rim, u bah Bison Paslein, u ST Morcha President, u bah Jiedlang Sana, u Vice President BJP West Jaiñtia Hills District, u bah Karbar Tyngkan bad kiwei kiwei.