Nongstoiñ, Lber 10 : Ka Ophis u Deputy Commissioner Eastern West Khasi Hills District, ha ka 9 tarik Lber 2024 ka la pynlong ïa ka prokram pynkhuid shnong halor ka phang ‘My City My Campaign’. Ïa kane ka campaign la pynlong ha ryngkat ka jingïatreilang bad ka Village Water and Sanitation Committee Pyndengumiong Mairang
Da ka jingthmu ban wanrah ïa ka khuid ka suba hapoh ka thaiñ Mairang, u Deputy Commissioner Eastern West Khasi Hills, District Bah G. Kharmawphlang I.A.S, ha ryngkat ka jingïatreilang bad kiwei pat ki ophisar sorkar, ki Rangbah Shnong bad ki nongshong shnong jong ka Shnong Pyndengumiong, ki la ïasnoh kti lang ban pynkhuid ïa ki jaka paidbah jong ka shnong Pyndengumiong.
La sdang ban pynkhuid naduh ka skul St.Thomas Higher Secondary School shaduh Mairang stand bus. Ka jingthmu hi jong kane ka campaign ka long ba baroh ki nongshong shnong, ki dei ban don ka jingkitkhlieh ha kaba ïadei bad ka khuid ka suba jong ka shnong ka thaw bad ki sawdong sawkun jong ka.
U Bah Kharmawphlang, u pynpaw ka jingkyrmen kaba skhem ba lada ki nongshong shnong ki don ka jingkitkhlieh ha kaba ïadei bad ka khuid ka suba, kan ym don kano kano ka jingeh ban wanrah jingkhuid hapoh shnong hapoh thaw.
