Shillong, Naiwieng, 22: Ka All India Organization of Chemists and Druggists (AIOCD) ka la pynpaw ïa ka jingpyrshah kaba jur halor ka jingtyrwa ban ïatreilang hapdeng ka Swiggy Instamart bad ka PharmaEasy na ka bynta ban pynpoi ïa ki dawai lyngba ki Dark Store (ki retail Outlet ne Distribution Center ba dei thik tang ka bynta ka Online Shopping), da kaba kdew ba ka pynkheiñ ïa ka aiñ bad ka buh jingma ruh ïa ka koit ka khiah jong ki paidbah.
U President jong ka AIOCD u JS Shinde u la ong ba kane ka jingïatehlok ka long kum ka jingkyndat sharud ïa ka Essential Standards kaba ïadei bad ka jingpeit bha ïa ki Prescription ne ki jingthoh katkum ba la bthah da ki doktor, ka jingithuh ïa ki nongpang bad ka jingma ïa ka koit ka khiah jong ki paidbah.
Ka AIOCD ka la bynrap ba ka Rltra-fast Delivery Model ka lah ruh ban buh jingma na ka jingdon jong ki dawai ba la kut por ne ki dawai ba shu shna thok, kiba lah ban ktah wat ïa ki nongpang haba ki pyndonkam.
“Kum kine ki kam, yn ym lah daleilei ruh em ban bud ïa ki kyndon ba la buh,” la ong ka AIOCD.
Ka AIOCD ka la ong wat hapdeng ka jingpyrshang jong ka sorkar ban ïakhun ïa ka jingma jong ki Anti-Microbial Resistance (AMR), ka jingbym lah tehlakam ïa ka jingtreikam ong ki e-pharmacy ka lah ban nang wanrah ïa ka jyrwit jyrwat ha kane ka jingeh ba la don lypa. Kum kane ka jingïateh lok kan pyntlot ïa ka jingpyrshan ban ïakhun ïa ka AMR,” la bynrap ka AIOCD.
Ka AIOCD ka kyntu ïa ka Sorkar ban khmih bniah ïa kine ki mat bad ban pyntreikam ïa ki lad ki lynti ba pynthikna ïa ka jingshngaiñ, ka jingkoit jingkhia ba thikna na ka bynta ki nongshong shnong.
Ka Meghalaya Healthcare Association, kaba ïasnoh bad ka AIOCD ka la pynpaw ïa kane kajuh ka jingsngew kumba la pynpaw ka AIOCD, bad ka pyrshah ruh ïa kano kano ka jingïamynjur hapdeng ka e-pharmacy bad ka swiggy kaba lah ban lam sha ka jingma ïa ki nongpang.
