Ba pynslem ka DSC ïa ki Examin bad Interview, leit kynduh DC ka VPP Jaiñtia Hills

Jowai, Naiwieng 21: Ka Voice of the People Party (VPP) West Jaiñtia Hills mynta ka sngi Thohdieng 22 tarik ka la leit ban ïa kynduh ïa u Deputy Commissioner ka WJHD bad ban aiti ïa ka dorkhas, halor ka jingpynslem jong ka District Selection Committee (DSC) ban khot pynlong ïa ki Examinations bad Interview halor ki kam bapher bapher hapoh ka District kiba la sah teng mynta da ki bun bun snem.
U Organising Secretary Bah Chanbor Rymbai ula ong ka VVP ka la aiti ha u DC ïa kitei ki kam ka DSC kiba dang sahteng haduh mynta, kiba kynthup ïa ka post Boatman (Advt. Ref. No. DSC 3/Advt/2012/109, dated August 21, 2017), Gram Sevak, Gram Sevika, Sericulture Demonstrator (Advt. Ref. Nos. DSC 3/ADVT/2012/236, DSC 3/ADVT/2012/117, dated November 3, 2020, bad DSC 3/Advt/2012/125, dated January 6, 2021), kumjuh ruh LDA Cum Typist and Grade IV positions (Advt. Ref. No. DSC 3/Advt/2012/205, dated November 19, 2021).
Ula ong hadien ka jingïoh jingujor na kiba bun ki samla ba ïakhun ïa kitei ki kam ba dang sah haduh mynta, ki dkhot ka seng kiba mih shakhmat ban leit ïakren ïa katei ka jingeh kaba la ktah wat ïa ka rta wad kam jong ki samla. Da kaba kdew ruh ïa ka jingduna ki nongtrei ha ki tnad sorkar bapher bapher.
Hadien ba ki dkhot ka VPP ki ladep ban ïakynduh bad u DC ki la pynsngew ïa ka jingpynshai ba ka daw hi ka long na ka jingpyntrei ïaka Roster bad la kumno kumno ki bor District kin sa ïaleh ban pyndep hapoh u bnai Nohprah jong une u snem lyngba ka jingbthah jong u Principal Secretary ka sorkar Jylla, khnang ba kito ki samla wad kam kin ïoh ïa ka hok jong ki.