Shillong, Naiwieng, 22: U nongwad RTI bapawkhmat ka jylla u Bah Disparsing Rani uba la ïoh pdiang ïa ka jingujor na ki paidbah nongshong shnong halor ka rukom ai laisen ïa ki nongsam khaw u la pan da ka RTI na ka ophis Deputy Commissioner (Supply) East Khasi Hills Distirct ban ïoh ïa ka jubab kaba shai.
Ha ka jingïakren bad ki lad pathai khubor u Bah Rani u la ïathuh ba katkum ka jubab RTI la pyntip ba u Rangbah Shnong bad ki dkhot jong ka Executive Committee jong ka Dorbar Shnong kim lah satia ban sam ïa ki marbam reshon.
U la pyntip ruh ba jubab RTI ka pyntip ba ki Wholesaler kim lah satia ban shim pisa na ki nongsam khaw reshon Fair Price Shop namarba ka Sorkar ka la ai jingkyrshan pisa T. 105 shi byrni ïa ki Wholesaler bad ïa ki Fair Price Shop la ai jingïarap T. 180 tyngka.
U la ong ba katkum ka jubab RTI, wat ki Self Help Group ne ki Society bad kiwei kiwei ki lah ban sam ïa u khaw reshon.
U la ïathuh ruh ba ka ophis Deputy Commissioner (Supply) East Khasi Hills Distirct ka la pyntip ba kam shym la ïoh pdiang satia ïa ka jingujor ba ka don ka jingshim pisa da ki Wholesaler bad ki Fair Price Shop. “Lada don kum kita, ki la kyrpad ïa nga ban pyntip sha ka ophis,” la ong u Bah Rani.
“Ki Wholesaler ki dei ban don ruh ïa ki kudam iing dewbilat ym da ka ïing tin ha ki shnong ba ki sam ïa u khaw,” la ong u Bah Rani katkum ka jubab RTI.
