Dei ki Nongkhaïi tuh ba pynkulmar ha Umsyiem, kurup ki saree bad ki jaiñ ba palat 2.70 lak tyngka

Shillong, Jylliew 26: Ki Shipai BSF ki la kynnoh ba ka jingjia kaba la jia ha ka Sngi U Blei mynmiet ha ka surok Pynursla- Dawki ha khappud India- Bangladeh kadei ka jingïadonkti ki nongkhaïi tuh.
Katkum ka kyrwoh ba la phah da u Public Relation Ooficer jong ki BSF, Shillong, la kynnoh ba ki BSF kiba ap pahara hajan Umsyiem, ki la ïoi ïa ki katto katne ki briew kiba thmu ba leit sha khappud ryngkat ki jingkit. Haba ki la ïohi kumne, kine ki briew ki la phet noh na katei ka jaka bad bret ïa kine ki jingkit ha katei ka jaka. Ynda ki BSF ki la wad ha katei ka jaka ki la lap ïa ki saree kiba shong dor kumba 50 hajar tyngka. Haba ki la wad shuh shuh, ong u PRO la lap ïa ki jaiñ,ki jingpynbhabriew bad ki jaiñ kiba shong dor kumba 2.21 lak tyngka.
Hadien ba ki la kurup ïa kitei ki tiar, ynda la poi ha Ktem la don shi kynhun ki briew kiba wan bad ki la kawang maw, kawang bilor thylli, ha kaba uwei ki shipai BSF u la mynsaaw. U PRO u la ong ruh ba u Commandant, u la pyrshang ban tem bad pynsngewthuh ïa ki, hynrei kine ki paidbah kim shym la sngap bad ki la nang pynjur pynban ka jingkawang maw. Dei namar kane ka daw ba ki BSF ki la siat pynma sha suiñ haduh saw sien. Dei hadien kane ba la lah ban tem ïa ka jingïakynad.
Ki BSF ki la kynnoh ruh ba ha kajuh ka jaka ha ka 5 tarik mynta u bnai ruh, ki nongkhaïi tuh ki la kawang maw ïa ki shipai BSF ba pahara bad hadien ba la beh ïa ki, la ïoh kurup ïa ki jaiñ ki nep bad ki jingiwbih ba kot sha ka 1 lak tyngka.
Shuh shuh ki BSF, ki la kynnoh ba ka Umsyiem ne ka surok hajan Umsyiem kadei ka kad khaïi tuh kaba jur bha sha Bangladesh, ha kaba kadei ka jaka khaïi masi, jaiñ, jingiwbih bad kiwei kiwei ki mar.