Bthah u CM ïa ki Committee ban bishar bniah lang ïa ka jingdawa bhah kyrpang ki riewlum rit paid ha ka jylla

Shillong, Jylliew 26 : U Myntri Rangbah ka Jylla Conrad K Sangma mynta ka Lah Sngi U Blei, ula pyntip ba ula dep bthah ïa ki Committee ba la thaw ban shong bishar ïa ka State Reservation Policy ba kin bishar bniah lang ïa ka jingdawa jong kiwei ki riewlum rit paid ka Jylla ban ai ïa ka bhah ba 15% sha ki ha ka Job Reservation Policy.
Kane ka jingbthah ka long ïa ka Committee ki Seng Saiñ Pyrthei bad ka Expert Committee ki ban shong bishar biang ïa ka State Reservation Policy ka Jylla kat kum ki jingdawa jong ki kynhun bapher bapher lem bad seng saiñ pyrthei.
Haba pyntip ïa kane, u Conrad ula ong ba ki riewlum rit paid bapher bapher ka Jylla ki la wan aiti da ka dorkhas sha u ba ki dawa ban ai bynta lem ïa kine ki jaidbynriew ha ka bhah thungkam ka Jylla.
“Halor kane, nga la pyntip sha phi ba ïa kine ki dorkhas yn sa phah sha ka Committee jong baroh ki seng saiñ prythei bad ruh sha ka Expert Committee. Ai ba kine ki Committee kin shong bishar (ïa ka jingdawa) bad kin sa ai jingtip sha ngi” ula bynrap.
Ha ka 22 tarik Jylliew, ka Meghalaya Indigenous Minority Tribes’ Forum (MIMTF) kala dawa haduh 15% ïa ka bhah thungkam na ka bynta ki jaidbynriew Rabha, Boro, Hajong, Koch bad ki Mann jong ka Ri-lum Garo.
Ha ka dorkhas, ka Forum kala ong “Ngi da kyrpad rit ba phin mynjur lem ha ka ban ai 15% ka bhah, haba phi shong bishar bad pynkylla thymmai ïa ka State Reservation Policy ïa ki riewlum rit paid ka Jylla khamtam ïa ki Hajongs, Koches, Rabhas, Boro-Kacharies bad ki Mann bad ban ailad lem ïa ki ba kin kiew bad ïaryngkat kyrdan lem bad ki Khasi, Jaintia bad Garo”.
“Lada mynjur, ngi sngew, kane kan khyllie pat ïa ka jingduhnong ba ngi la mad ha kine ki 51 snem ba la leit noh haba phai sha ka jingshakri lyngba ki kam Sorkar bad haba phai ruh sha ka pule dangle, ka kamai kajih bad kiwei kiwei” ki la ong.
Haba pynpaw ba ki dei ki Nongshongshnong ba pura ka Jylla Meghalaya, ka Forum ka la ong ba kum ki Khasi, Jaintia bad ki Garo, ki ruh ki dei ki “paid riewlum trai ri” haba bynrap ba ki Karbi/Marngar (Dimasa) ba sah ha Ri-Bhoi District ruh ki dei ki paid riewlum trai ri jong ka Jylla.
“Ha kane ka Job Reservation Policy ba mynta, kaba long 40 % ïa ki Khasi bad Jaintia, 40% ïa ki Garo, 15 ïa ki General bad 5% ïa ki OT bad Schedule Caste, watla ka bhah jong ngi ka long 5% hynrei ka jingshisha pat ka long tang 2% lada ym duna namar ngi hap ban ïasam lang bad ki Scheduled Caste bad kiwei kiwei ki riewlum na shabar ka Jylla kum ki Naga, Mizo bad kiwei kiwei” ka la ong.
ïa kane ka dorkhas la soi da ka Meghalaya Hajong Welfare Association, Meghalaya Rabha Jatio Sewa Sangha (MRJSS), Meghalaya Koch Association, Meghalaya Boro Sahitya Sabha bad ka All Mann Tai Speaking Welfare Association.