Shillong, Jylliew 26 : Ka KHADC ka la pynkhreh ban wad ki lad ki lynti mynta kumno ban pynkhie im biang ïa ka Monolith Festival kaban pyni nam ïa ka jingriewspah ka kolshor jong ki Khasi kiba hap ha u pud u sam jong ka Council.
Haba jubab halor ka motion ba wanrah da u MDC ka Shella, Bah Teinwell Dkhar ha ka Dorbar Mangtyngka hynne ka sngi, u CEM u la ong, “Na ka liang ka EC ngin shimkhia ban thaw ïa ki lad ki lynti nangne shakhmat ban pynlong biang ïa ka Monolith Festival ban pyni ïa ka jingriewspah ka Jaidbynriew ïa ka riti dustur.”
Ha kajuh ka por u CEM u la ong ruh ba mynta ki nongwan jngohkai kim ïohlad shuh ban ïohi ïa ka Heritage Village kaba don ha Mawphlang namar la bun kiba hap ban maramot.
U CEM u pan ruh ka jingïatrei lang jong baroh na ka bynta ban pyntyllun ïa ka kam khnang ba ka jingpynlong ïa ka festival kan long kaba ïaid beit.
