Yn phah jingthoh ka KHADC ban kyntiew ka sorkar ïa ka bhah ka council na ka khajna dewïong

By Mawphor News Desk On Jun 27, 2023

Kawei na ki jaka tih dewiong ha Meghalaya

Shillong, Jylliew 26: Ka Khasi Hills Autonomous District Council (KHADC) ha ka sngi Ba-ar ka la rai ban thoh sha ka sorkar jylla ba kan kyntiew ïa ka bhah (royalty share) ba ka ai na ka jingïoh khajna na u dewiong na ka 25% sha 35%.
“Na ka liang ka executive committee ngin buddien ïa kane ka kam bad ngin phah noh ka jingthoh sha ka sorkar jylla ba kan kyntiew ïa ka royalty share jong ka Council na u dewiong,” ong u Executive Member (EM) ba peit ïa ka Taxation u Bah Fantin J Lakadong haba jubab ïa ka mat ïatai ba la wanrah da u MDC ka HSPDP na Mawkynrew u Bah Martle N Mukhim ha ka dorbar mag tyngka jong ka council.
U Bah Fantin u la kular ruh hapoh ka ïingdorbar thaw aiñ ka KHADC ba ka EC ha ka jingïalam u CEM ba mynta u Bah Pynïaid Sing Syiem ba kan pynjanai ïa ka jingïoh lum khajna jong ka council.
U la ong ruh ba ka EC kan trei shitom ban pynthikna ba ka jinglait tuh ki khajna kan kut noh khnag ba ka jingïohlum khajna ka council kan kham kiew ban ïa ki snem kiba mynshuwa.
“Ka EC bad ka council hi baroh kawei ka dei ban phah jingthoh sha ka sorkar ban kyntiew ïa ka royalty share na ka 25% sha ka 35% khnang ban pynbiang ïa ka pla tyngka ka council baroh kawei”, ai jingmut u Bah Martle.
U la ong ruh ba ka la dei ka por ba ka sorkar kan pyni beit ïa ka jingïoh lum khajna na ki marpoh khyndew ha man la u snem khnang ban kdew shai ba ka bhah ba ka council ka ïoh ka dei kaba ïahap kat kum ka jingïoh khajna ka sorkar.
Haba kyrshan lang ïa kane u Nongïalam ka Liang Pyrshah u Bah Titosstarwell Chyne u la ong ba ka council ka don ka hok ban tip ïa ka jingïohlum khajna ka sorkar ha ka shisnem na ki mar poh khyndew.
“Bunsien nga sngew kumba ngi long ki nongkhrong kiba hap ban hun katba ka sorkar ka ai ïa ngi namar ngim ju tip katno ka ïohlum ha ka shisnem ba ngin sngewthuh ïa ka bhah ba dei hok ka council ban ïoh,” u la ong.
U la kdew ruh ba ka jinglait ei ka khajna na ka daw ka jingkhaïituh ïa u dewïong ka la pynduhnong shikatdei ïa ka council.
Na ka liang u MDC ka Nongthymmai u Bah Latiplang Kharkongor u la ong ba ka la dei ka por ïa ka council ban mynjur da ka official resolution ha kaba ïadei bad kane ka mat bhah khajna ba ka council ka dei ban ïoh khnang ba ka jingeh ba ju mih na ki snem sha ki snem kan kut noh.