Dei ka nongseng ka Projek Empathy na ka bynta ki kam ha ki jaka nongkyndong

New Delhi, Ïaïong 12: U Vice President jong ka India, u CP Radhakrishnan u la pynkup burom ïa ka Vibha Lakhera, Nongseng jong ka Project Empathy, kum ka jingithuh ïa ka jingtrei jong ka ha ki jaka nongkyndong, kaba long u mawmer ba kongsan na ka bynta kane ka sienjam bad baroh kiba ïadei bad ka.
Ha kine ki hynriew snem ba la leitnoh, ka Projek Empathy ka la trei borbah ban kyntiew ïa ka jingsngew lem kum ka jinglong ba ïalam lynti ha ka imlang sahlang, kaba poi sha ki jaitbynriew bapher bapher lyngba ki jingpyrshang ban pynsngewthuh bad ïatreilang kiba ïaineh.
Ïa ka jingïalang pynkup burom la pynlong ha Bharat Mandapam, New Delhi, kum shi bynta jong ka Jingïalang kaba ar sngi kaba la pynlong da ka Tnad Science and Technology ryngkat ka jingïatreilang bad ka North East Centre for Technology Application and Research bad ka ITITI Dun Sanskriti School, Dehradun. Ka jingïalang ka la sdang da ka jingkren pdiang burom na u Abhay Karandikaruba dei u Secretary ka Tnad Science and Technology.
Kum shi bynta ka jingïalang, la pynkhreh ban pyni ïa ka phlim “Weaves of Empathy” bad ka jingrwai “Walk With Me”. Ïa kane ka phlim bad ïa ka jingrwai la pynmih da u Parasher Baruah, uba la thaw ruh ïa ka jingrwai.
Haba ai jingkren ha kane ka sngi, ka Vibha Lakhera ka la ong, “Kane ka jingithuh kam dei tang ka jong nga, hynrei ka dei jong uwei pa uwei u briew uba ngeit ha ka jingsngewlem kum ka rukom im. Ha kine ki snem, ka jingpyrshang jong ngi ka long ban pynlong ïa ka jingsngewlem kaba shisha, kaba lah ban ïadei, bad kaba lah ban leh ha ki jaka nongkyndong. Kane ka jingithuh ka ai mynsiem ïa ngi ban bteng ïa ka jingïaid lynti jong ngi ryngkat bad ka jingaiti kaba khraw.”
Ka Project Empathy ka la pynpaw ka jingsngewnguh ïa u Tarun Vijay, MP barim ka Rajya Sabha, na ka bynta ka jingkyrshan jong u bad na ka bynta ban ai ka rynsan ban pynpaw pyrthei ïa kane ka sienjam.
Ïa kane ka jingïalang la plie da ki katto katne ki kynrem ki lyndan, ba kynthup ïa u Latjong ka Delhi, u Symbud Myntri Rangbah ka Arunachal Pradesh bad u Ashok Jhunjhunwala, uba la ai ïa ka jingkren ai khublei.
Ka jingïalang kaba la ai kyrteng “Transforming Tribal India Through Technology and Science: Opportunities, Aspirations and Pathways,” ka la ai ka rynsan kaba kongsan ban pyni ïa ki sienjam kiba thmu ban kyntiew ïa baroh bad ban pynkupbor ïa ka imlang sahlang.
Kane ka jingithuh ka ban jur ïa ka jingktah kaba don jingmut jong ka Projek Empathy bad ka pynskhem biang ïa ka jingdonkam jong ki sienjam ba la ïalam lynti da ka jingsngewlem ha kaba kyntiew ïa ka imlang sahlang kaba kham sngewthuh bad kaba kynthup lang ïa baroh.