Palat 15 hajar ngut ki samla na ki 8 tylli ki jylla NE ki ïashim bynta ha ka “The MY Bharat Budget Quest 2026”.

Shillong, Iaiong 12 : Palat 15 hajar ngut ki samla na ki phra tylli ki jylla kane ka thaiñ shatei lam mihngi ki la wan ban ïashim bynta ha ka
“ The My Bharat Budget Quest 2026 – North Eastern Region” kaba la sdang mynta ka sngi ha State Central Library So So Tham Auditorium, Shillong ban ïakren ïatai sani bha bad ka phang kaba ïadei bad ka Mang Tyngka jongka sorkar pdeng mynta u snem 2026.
ïa kane ka prokram la pynbit pynbiang da ka Mera Yuva Bharat (My Bharat) hapoh ka tnad Youth Affairs and Sport jongka sorkar pdeng bad kane ka jingïalang kan long mynta ka sngi bad kut lashai ka sngi.
Ha kane ka prokram la wan ban ïashim bynta da ki samla kiba tbit bha jong kane ka thaiñ kiba la ju ïashim bynta ruh ha kiba bun bah ki jingïalang bad jingïatai nia ha kylleng ka ri India.Ym tang ki samla hynrei ki don ruh ki khraw pyrkhat, ki nongsengkam seng jam bad ter ter.
Ka jingthmu ka long ban sei ïa ki khun samla ki ban long ki lawei ban kit ban bah ïa ka ri.
Haba kren ha ka jingïalang kum u kongsan u heh pulit IPS uba la shongthait na ka kam u bah Mariahom Kharkrang u la batai lyngkot shaphang ka Viksit Bharat @ 2047 kaba dei ka jingai mynsiem ïa ki samla ban wanrah ïa ka jingïalong kawei bad ïatrei lang na ka bynta ban kiew ban roi ka ri.
U la kyntu ïa ki samla ba kin noh synñiang la ka long ha kano kano ka rukom ruh la i dei iba rit ne ba khraw ruh na ka bynta ban poi sha ka thong. Ula kyntu ïa ki samla ba kin ïeng pyrshah ïa ka jingjyllei u drok ban nang ïai trei na ka bynta ka Nari Shakti.
ïa ka jingkren ai khublei la ai da u Joint Director u Bimal Patrick Shah uba la banjur ïa ka jingïashim bynta lang jong baroh naduh ki jingai jingkren , jingïatai nia halor ki polisi treikam jong ka sorkar. La ïoh ruh ïa ka jingkren na u State Youth Officer u bah Bobby Wahlang.